БҚО ның Бөрлі ауданындағы Кеңтүбек ауылында жаңа спорт залы пайдалануға берілді

Ашылу салтанатында сөйлеген сөзінде облыс әкімі Нариман Төреғалиев Мемлекет басшысы Қасым-Жомарт Тоқаев өз Жолдауларында ауылдардың әлеуетін арттыру, өңірлерді дамыту және тұрғындардың өмір сүру сапасын жақсарту мәселелеріне ерекше мән беріп келе жатқанын атап өтті.

"Кеңтүбек ауылында ашылып отырған бұл спорт залы – елді мекендерді дамытуға бағытталған жүйелі жұмыстардың нақты нәтижесі. Мұндай нысандар ауыл жастарының спортпен тұрақты айналысуына, уақытын тиімді өткізуіне және денсаулығын нығайтуына мүмкіндік береді", – деді өңір басшысы.

Сурет: Мәди Файзоллаұлы

Аталған спорт нысаны Карашыганак Петролеум Оперейтинг Б.В. компаниясының әлеуметтік инвестициялық міндеттемелері аясында салынды. Компанияның өңірлерді әлеуметтік дамытуға бағытталған қолдауы ауылдық жерлерде спорт инфрақұрылымын кеңейтуге ықпал етіп келеді.

Сурет: Мәди Файзоллаұлы

Құрылыс жұмыстарын БатысМунайСтрой ЖШС жүзеге асырды. Нысан белгіленген мерзімде аяқталып, пайдалануға берілді.

Сурет: Мәди Файзоллаұлы

Спорт залы бір қабатты ғимараттан және оған жапсарлас әкімшілік-тұрмыстық корпусынан тұрады. Ғимараттың жалпы ауданы – 1 030 шаршы метр, жер учаскесінің аумағы – 6 524 шаршы метр. Спорт залының өткізу қабілеті бір мезетте 464 адамды құрайды, бұл ауыл тұрғындары мен жастардың спортпен жүйелі түрде шұғылдануына кең мүмкіндік береді.

Сурет: Мәди Файзоллаұлы

Жаңа спорт залы Кеңтүбек ауылының спорттық өмірін жандандырып, болашақта жас спортшыларды тәрбиелеуге және ауыл тұрғындарының денсаулығын нығайтуға қызмет ететін маңызды нысанға айналды.

Ақпаратты "БатысМұнайҚұрылыс" Сервистік Компаниясы" ЖШС ұсынды.