БҚО да әлеуметтік осал топтағы 19 мыңнан астам адам тұрғын үй кезегінде тұр

БҚО құрылыс басқармасының басшысы Нұркен Молдашевтің өңірлік коммуникациялар қызметі алаңында өткен брифингте мәлім еткеніндей, бұл мақсатқа 14 млрд теңге, соның ішінде жергілікті қазынадан 4 млрд, республикалық бюджеттен 9,9 млрд теңге қарастырылған.

Нұркен Молдашевтің сөзіне қарағанда, сонымен қатар баспанасы апатты деп танылған отбасылар үшін Орал қаласы мен Тасқала ауданында 131 пәтер сатып алынатын болады.

— Аталған іс-шаралар тұрғын үйге қолжетімділікті арттыруға, әлеуметтік осал топтарды қолдауға және өңірдегі құрылыс саласының тұрақты дамуын қамтамасыз етуге бағытталған. Күні бүгін облыс бойынша халықтың әлеуметтік осал топтары санатына кіретін 19 мыңнан астам тұрғын кезекте тұр. Өткен жылы аталған санаттағы тұрғындар үшін Орал қаласы және аудандардан 580 пәтер сатып алынды. Ал тұрғын үйі апатты деп танылған отбасыларға 147 пәтер берілді, — деді Нұркен Молдашев.

Басқарма басшысының айтуынша, оған қоса 2026 жылы «Отбасы банкінің» салымшыларына баспана беру мақсатында Оралдағы «Ақжайық» шағынауданында жаңа кварталдан жеке құрылыс салушылардан 11 тұрғын үй құрылысы біткен соң 1 200 пәтер сатып алу жоспарланды.

Тұрғын үйлер IV жайлылық класына сай болуы тиіс, таза әрлеуде беріледі. Ауласы абаттандырылған және көгалдандырылған, демалыс аймақтары мен автотұрақтары бар, заманауи материалдар қолданылады.

— 2026 жылы «Тұрғын үй-коммуналдық инфрақұрылымды дамытудың тұжырымдамасы» аясында кезекте тұрғандар үшін Оралда 4 көппәтерлі тұрғын үй және Теректі ауданы Подстепный ауылында 13 тұрғын үй құрылысы ойластырылған. Нәтижесінде барлығы 776 пәтерді жыл соңына дейін пайдалануға беру көзделуде, — деп қосты Нұркен Молдашев.

Еске сала кетейік, бұдан бұрын Орал қаласында жеке тұрғын үй салу үшін жер телімі беріле ме, соны жазған болатынбыз.