​Brent мұнайы бірнеше айдан бері алғаш рет барреліне 80 долларға дейін құлдырады

Әлемдік нарықта Brent маркалы эталонды мұнайдың бағасы барреліне 80 долларға дейін төмендеді. Мұндай құлдырау ағымдағы жылдың наурыз айынан бері алғаш рет тіркеліп отыр.

«Қара алтын» құнының төмендеуіне инвесторлардың АҚШ пен Иран келісімге келуі мүмкін деп күткен үміті негіз болды.

Сарапшылар атап өткендей, Вашингтон мен Тегеранның өзара ымыраға келуге айтарлықтай жақындағаны туралы түсіп жатқан хабарламалар шикізат котировкаларына елеулі қысым жасап жатыр. Күткен уағдаластық әлемдегі мұнай саудасы үшін ең маңызды әрі стратегиялық тұрғыдан шешуші бағыттардың бірі болып табылатын Ормуз бұғазы аймағындағы қауіпсіздік пен кеме қатынасы ережелеріне тікелей қатысты.

«Нарыққа қатысушылар өңірдегі геосаяси шиеленістің бәсеңдеуінен үлкен үміт күтіп отыр. Танкерлердің бұғаз арқылы еркін әрі қауіпсіз өтуінің сақталуы шикізат жеткізілімінің үзілу қаупін барынша азайтады. Дәл осы фактор қазір баррель құнына әсер етіп, бағаны төменге тартып жатыр», — дейді сарапшылар.

Мұнай бағасының төмендеуі Қазақстанда әрдайым басты назарда болады, өйткені көмірсутектерді экспорттаудан түсетін табыстар Ұлттық қор мен республикалық бюджеттің айтарлықтай бөлігін құрайды.

Бүгін, 10:06