Бүкіл Алматы LEZ аймағына айналады сарапшы жүргізушілерді не күтіп тұрғанын айтты

28 сәуірде Алматыда еліміздегі алғашқы шығарындылары төмен аймақ (LEZ) іске қосылды. Қазір және жыл аяғына дейін бұл жоба пилоттық режимде жұмыс істейді. Заң шығару саласының сарапшысы, Алматының атмосфералық ауасын қорғау ережелерін әзірлеу жөніндегі жұмыс тобының жетекшісі Ерлан Бұзырбаев LEZ аймағының жұмыс істеу тәртібін түсіндіріп берді, деп хабарлайды Tengri Auto.

Бұзырбаевтың айтуынша, "пилоттық" кезеңде жүргізушілерден тиісті техникалық байқаудан өту немесе аймаққа кіру үшін ақы төлеу сияқты қандай да бір іс-әрекет талап етілмейді. Сондай-ақ оларға айыппұл салынбайды және көлікпен кіруге шектеу қойылмайды.

"Қазір көлік иелерінің техникалық тексеруден өтуі ерікті түрде жүзеге асады, ал одан өтпеу ешқандай құқықтық салдарға әкеп соқпайды", - деп атап өтті ол.

Сарапшы пилоттық жоба аяқталғаннан кейін қаланың географиялық ерекшеліктеріне байланысты LEZ аймағының қолданысын бүкіл қала аумағына тарату мүмкіндігін қарастыруды ұсынды.

"Алматы тау етегіндегі қазаншұңқырда орналасқан, оның климаттық және табиғи жағдайлары ластаушы заттардың табиғи жолмен таралуына кедергі келтіреді. Атмосфералық ауаның ластануы жекелеген әкімшілік аудандар немесе көшелермен ғана шектелмейді, сондықтан LEZ-дің аумақтық қамтылуының шектеулі болуы бұл механизмнің экологиялық тиімділігін айтарлықтай төмендетуі мүмкін", - деді сарапшы.

Бұл ретте Ерлан Бұзырбаев LEZ аймағының шекарасын "пилоттық" жоба сәтті аяқталып, бүкіл жүйенің толыққанды жұмысқа дайындығы тексерілгеннен кейін ғана бекіту керек екенін айтты.

Жүйені толық іске қосу үшін шығарындылардың түсінікті нормалары, автокөліктерді тексерудің бірыңғай ережелері, операторлардың жеткілікті болуы және бәсекелестік нарық қажет. Сондай-ақ тексеру тәртібі, ақпараттық жүйелер және автоматты әкімшілендіру тетіктері дайын болуы тиіс.

Бұған дейін 2027 жылдан бастап Алматының орталығында тағы бір шектеу енгізілетіні хабарланған болатын.

Тағы оқыңыз: Алматының LEZ аймағына шыққанына 7 жыл болмаған көліктер тексерусіз өте ала ма?

Бізді Google-дың негізгі дереккөздер тізіміне қосыңыз