БҰҰ басшысы: АҚШ пен Израильдің шабуылдары қауіпті жағдайға жеткізді

БҰҰ Бас хатшысы Антониу Гутерриш Анкарадағы Президенттік кешенде өткен салтанатта Ататүрік атындағы халықаралық бейбітшілік сыйлығын қабылдап тұрып, АҚШ пен Израильдің Иранға жасаған шабуылдары бүкіл аймақты қауіпті жағдайға жеткізгенін мәлімдеді, деп хабарлайды АА.

Гутерриштің айтуынша, Таяу Шығыстағы эскалация халықаралық саудаға кері әсер етіп, энергия бағасын өсіріп, әсіресе әлеуметтік тұрғыдан әлсіз топтарға ауыр салмақ түсіріп отыр. Ол диалог пен деэскалация ғана жағдайдан шығудың тиімді жолы екенін атап өтіп, тараптарды әскери әрекеттерді тоқтатуға және бейбіт тұрғындарды қорғауға шақырды.

Сонымен қатар, Бас хатшы Түркияның босқындарға көрсеткен көмегін ерекше атап өтті. Ол қасиетті Рамазан айында дәстүрлі түрде ынтымақтастық сапарларын жасайтынын айтып, биылғы сапарын Түркияға арнағанын жеткізді.

«Бұл жолы мен Түркиядамын, түрік халқының қонақжайлығына құрмет көрсету үшін келдім», – деп жазды ол әлеуметтік желідегі парақшасында.

Гутерриш Түркияның әлемде ең көп босқын қабылдаған мемлекет екенін еске салып, елдің есігін зорлық-зомбылықтан қашқан миллиондаған адамдарға ашқанын атап өтті. Алған сыйлығын ол БҰҰ-ның гуманитарлық және бейбітшілік миссияларында қаза тапқан қызметкерлерге, әсіресе Газа секторында құрбан болғандарға арнады.

Бүгін, 11:52