БҰҰ Ирандағы АҚШ тың ықтимал соғыс қылмыстарын атап өтті

Бейсенбі күні БҰҰ-ның тапсырмасымен құрылған адам құқықтары жөніндегі сарапшылар тобы АҚШ-тың Иранға жасаған екі соққысы салдарынан кемінде 178 бейбіт тұрғын қаза тапқанын және бұл әрекеттерді соғыс қылмысы деп санауға "негізді себептер" бар екенін мәлімдеді. Бұл туралы БҰҰ-ның тәуелсіз халықаралық комиссиясының баяндамасында айтылған, деп хабарлайды Tengrinews.kz.

Комиссия жаңа баяндаманы БҰҰ Адам құқықтары жөніндегі кеңесінің 63-сессиясы аясында жариялады.

Иранның Минаб қаласындағы бастауыш мектепке жасалған және 150-ден астам адамның өмірін қиған соққыны АҚШ күштері жасаған. БҰҰ-ның тәуелсіз халықаралық миссиясы осындай қорытындыға келді.

Миссия мектепке жасалған соққыны соғыс қылмысы деп пайымдауға негізді себептер бар екенін мәлімдеді.

"Шаджаре Тайебе" мектебі 28 ақпанда, АҚШ пен Израильдің Иранға жасаған әскери соққысының алғашқы сағаттарында шабуылға ұшыраған. Құжатқа сәйкес, ғимаратқа екі оқ-дәрі тиген. Алғашқы соққыдан кейін балаларды екінші қабаттағы намазханаға жасыруға тырысқан, алайда екінші снаряд дәл сол жерге түскен. Миссия мектептің азаматтық нысан екені анық көрініп тұрғанын - қабырғалардағы балалар суреттері, ойын алаңы және сыныптардағы оқу құралдары соны айғақтайтынын және оның әскери мақсатта пайдаланылмағанын баса айтты.

"28 ақпандағы АҚШ пен Израиль шабуылдарынан кейін біз АҚШ-тың соғыс қылмыстарын жасағанына сенуге негізді себептер таптық. Ретсіз жасалған соққылар бейбіт тұрғындардың қаза болуына, жаралануына және азаматтық нысандардың зақымдалуына әкеп соқты. Сондай-ақ екі бөлек әуе соққысы салдарынан әйелдер мен балаларды қоса алғанда, кемінде 178 бейбіт тұрғын қаза тапты", - делінген құжатта.

Сарапшылар Ламардтағы спорт кешеніне жасалған соққыға қатысты да осындай қорытындыға келді. Баяндамада шабуыл салдарынан жақын маңдағы тұрғын үйлер мен мектеп зақымданып, 22 бейбіт тұрғын қаза тапқаны немесе жараланғаны айтылған.

Баяндамада бұл соққының да талғаусыз сипатта болғаны, сондықтан соғыс қылмысы болып табылатыны туралы шешім шығарылды.

Комиссия Иран мен АҚШ-ты барлық бұзушылық пен қылмыстарды дереу тоқтатуға, құрбан болғандарға зиянды толық өтеуді қамтамасыз етуге және мұндай құқық бұзушылықтардың қайталанбауына кепілдік беруге шақырды.

Бізді Google-дың негізгі дереккөздер тізіміне қосыңыз