BYD әлемдік автонарық көшбасшысы болуды мақсат етіп отыр

Қытайдың жетекші автокөлік өндірушілерінің бірі BYD Auto алдағы бес жыл ішінде әлемдегі ең ірі автомобиль компаниясына айналуды көздеп отыр.
Компания басшылығы өндіріс көлемі бойынша қазіргі нарық көшбасшылары – Toyota мен Volkswagen концерндерін басып озуды жоспарлап отыр.

Бұл туралы BYD Auto директорлар кеңесінің төрағасы Ван Чуаньфу Шэньчжэнь қаласында өткен акционерлердің жылдық жиналысында мәлімдеді.

Оның айтуынша, компанияның қарқынды дамуына жаңа буындағы технологиялар, әсіресе екінші буын Blade аккумуляторлары серпін береді. Бұл батареялар электромобильдердің қауіпсіздігі мен тиімділігін арттырып, өндіріс көлемін ұлғайтуға мүмкіндік береді.

– Бес жылдан кейін BYD өндіріс көлемі бойынша әлемдегі ең ірі автокөлік өндіруші компанияға айналады, – деді Ван Чуаньфу.

Қазіргі таңда BYD әлемдік автонарықтағы ең ірі бес өндірушінің қатарына кіреді. 2025 жылдың қорытындысы бойынша компания құрамындағы BYD, Denza, Fangchengbao және Yangwang брендтері жалпы саны 4,6 миллион автокөлік сатқан.

Салыстырмалы түрде алғанда, әлемдік көшбасшы саналатын Toyota Motor Corporation сол кезеңде 11,3 миллион көлік өткізген. Оның құрамына Toyota, Lexus, Hino және Daihatsu брендтері кіреді.

Сарапшылардың пікірінше, BYD алдағы бес жылда Toyota-ны басып озу үшін жыл сайын кемінде бір миллионнан астам қосымша көлік сатуы қажет. Бұл өте ауқымды мақсат болғанымен, компания электромобильдер мен гибридті көліктер сегментіндегі қарқынды өсімге сенім артып отыр.

2026 жылдың мамыр айында BYD Қытай нарығындағы көшбасшылық орнын қайта иеленіп, бір ай ішінде 383 мыңнан астам автомобиль сатты. Дегенмен бұл көрсеткіш өткен жылдың сәйкес кезеңімен салыстырғанда небәрі 0,25 пайызға жоғары болған.

Соңғы жылдары компанияның халықаралық нарықтағы белсенділігі де артып келеді. Әсіресе Еуропа, Латын Америкасы және Орталық Азия елдерінде қытайлық брендтің үлесі өсуде.

Қазақстанда да BYD көліктеріне сұраныс айтарлықтай көбейіп келеді. Электромобильдер мен гибридті көліктер сегментіндегі сатылым көлемі биылғы жылдың алғашқы төрт айында бес есеге жуық артқан. Осы кезеңде елдегі ең танымал жаңа энергия көздерімен жүретін көлік (NEV) моделі ретінде гибридті BYD Song Plus DM-i танылды.

Сарапшылардың бағалауынша, әлемдік автонарықта электрлендіру үдерісінің күшеюі қытайлық өндірушілердің позициясын нығайтып, дәстүрлі автогиганттармен бәсекені жаңа деңгейге шығаруы мүмкін.