Депутаттар платформасын сынға алды

АСТАНА, 1 сәуір – Sputnik. Мәжілістің бүгінгі отырысында мұғалімдер жиі пайдаланатын Kundelik.kz платформасына қатысты маңызды мәселе көтерілді, деп хабарлайды Sputnik Қазақстан тілшісі.

Kundelik.kz платформасы оқушылар мен мұғалімдер арасындағы байланысты жеңілдетуге және білім сапасын арттыруға арналған құрал ретінде енгізілген болатын. Депутат Наталья Дементьеваның айтуынша, платформа өз миссиясынан ауытқып, қосымша есеп пен формализмге айналып келеді.

"Мысалы, аптасына 25 сағаты бар мұғалім Kundelik.kz-те күніне 1-1,5 сағат уақыт жұмсауына тура келеді. Яғни, күнделікті тақырыптық жоспар жасау, үй тапсырмаларын қадағалау, бағалау және оқушының түсінгенін талдауды электронды күнделікке енгізу қосымша уақытты талап етеді. БЖБ және ТЖБ кезеңінде бұл жұмыс көлемі екі есеге артатыны айтпаса да түсінікті. Нәтижесінде мұғалімнің сабаққа дайындалатын уақыты қысқарады", - дейді Дементьева.

Оның ойынша, білім беру саласындағы парадокс – қағазбастылықтан арыламыз деп жүріп мұғалімдерді цифрлық есептілікке байлап қойған.

"Бастапқы идея қандай еді?! Мұғалімді артық есептен босатып, оның уақытын оқушыға бағыттау болды. Нәтижесінде қағаз азайды, бірақ есеп беру саны азаймады, еркіндік артпады, керісінше, бақылау күшейді. Қазақстандағы қазіргі жүйеде мұғалім педагог емес, операторға айналып, сабақ сапасы емес, журнал толтыру сапасы бағаланады", - деп атап өтті депутат.

Мәжіліс депутаттары үкіметке бірнеше нақты ұсыныс жолдады. Олар:

1.

Kundelik.kz функционалын қайта қарап, тек оқыту процесіне қажетті деректер қалдыру;

2.

Мұғалімнің цифрлық жүктемесіне аудит жүргізіп, нақты қанша уақыт платформаға кететінін анықтау;

3.

Мұғалім жүйеге емес, жүйе мұғалімге қызмет ететін халықаралық модельге көшу.