Президент спорт федерацияларын сынға алды

Құтқарушылар қоғамда салауатты өмір салтын насихаттауға, балалар мен жастар арасында спортты дәріптеуге зор үлес қоса алады.

Бүгін осы мамандық иелерін кәсіби мерекелерімен құттықтаған Мемлекет басшысы, Төтенше жағдайлар министрлігіне спорт федерацияларымен бірлесе жұмыс істеуді тапсырды. Бүгінде көптеген федерацияны бизнес өкілдері мен шенеуніктер басқарады. Алайда кейбірі спортты қолдауға емес, өз имиджін көтеруге көбірек мән береді деп сынға алды Президент. Осы ретте Қасым-Жомарт Тоқаев мұндай көзқарасты өзгерту қажет екенін айтып, спорт пен дене шынықтыруды құрметті қоғамдық миссия әрі азаматтық жауапкершілік деп қабылдауға шақырды. Сондай-ақ Туризм және спорт министрлігі мен спорт федерациялары арасында тең әріптестік орнатып, міндеттерді нақты айқындау керектігін айтты. 

Қасым-Жомарт Тоқаев, Қазақстан Республикасының Президенті:

- Ел ішінде және шетелде атақ-абыройыңды асқақтату үшін федерация басқару дұрыс емес. Оған жол беруге болмайды. Сондықтан мемлекет кәсіпкерлерді, соның ішінде ірі бизнесмендерді қолдайды. Бірақ мемлекет пен қоғам да олардың осыған сай әрекет еткенін күтеді. Атап айтқанда, бұл спортты, мысалы футболды коммерцияландыру мәселесіне қатысты. Кеше Премьер-министрге берген тапсырмамда шағын және орта кәсіпкерлікті қолдау қажеттігіне тағы да баса назар аудардым. Қазір бірқатар спорт федерациясына бизнесмендердің, меценаттардың жаңа буыны келе бастады. Оларға спортты дамыту саласындағы жағдайды жақсарту міндеті жүктелді. Қазірдің өзінде жұмысқа жауапкершілікпен қарап, маңызды жеңіске қол жеткізуге бар ынтасымен ұмтылатындарын байқап отырмыз.