Домбыра, жануарлар және өтемақылар Қазақстанда әуе тасымалы қағидалары өзгереді

Көлік министрлігі әуе тасымалы қағидаларына өзгерістер енгізу туралы жоба дайындады. Түзетулер музыкалық аспаптар мен жануарларды тасымалдаудың жаңа нормаларын, мүгедектігі бар жолаушылар үшін қосымша кепілдіктерді, сондай-ақ рейстердің кешігуі үшін өтемақы төлеу мерзімін қысқартуды қарастырады, деп хабарлайды Tengri Travel.

Домбыра мен қобызды салон ішінде тасымалдауға рұқсат беріледі

Басты жаңалықтардың бірі – музыкалық аспаптарды тасымалдауды реттеу болмақ. Жобада белгіленген талаптар сақталған жағдайда оларды ұшақ салонында қол жүгі ретінде, жеке жолаушы орнында немесе тіркелген багажда тасымалдау мүмкіндігі қарастырылған.

Сонымен қатар музыкалық аспаптарды, соның ішінде домбыра мен қобызды сенімді қорғаныс қабында (футлярда) салон ішінде тасымалдауға ресми рұқсат беру ұсынылған. Олардың өлшемі 110×35×30 сантиметрден, ал салмағы 10 келіден аспауы тиіс.

Жануарлары бар жолаушылар үшін не өзгереді?

Жоба әуе компаниялары белгілеген ережелерге сәйкес жануарларды ұшақ салонында тасымалдау мүмкіндігін қарастырады.

Бұдан бөлек, заңнамалық деңгейде мүгедектігі бар жолаушыларға әуе тасымалы бойынша жеңілдіктер беруді бекіту ұсынылып отыр.

Рейске бірінші кезекте кімдер отырғызылады?

Көлік министрлігі әуе компаниясы ұшақты сыйымдылығы азырақ әуе кемесіне ауыстырған жағдайда орындарды ұсыну тәртібін белгілеуді ұсынады.

Ұшаққа отырғызу кезінде мына тұлғаларға басымдық беріледі:

кәмелетке толмаған жолаушылар; мүгедектігі бар адамдар; ауыр дертке шалдыққан жолаушылар; жүкті әйелдер; зейнет жасындағы азаматтар. Өтемақылар қашан төленеді?

Түзетулер жолаушылардың құқықтарын қорғауды күшейтуге бағытталған. Мәселен, тасымалдаудың кешігуі үшін айыппұл төлеудің ең ұзақ мерзімін өтініш берілген күннен бастап 10 күнтізбелік күннен аспайтын уақыт деп белгілеу ұсынылады.

Бұған қоса, егер әуе компаниясының кінәсі дәлелденсе, оларды қол жүгінің зақымдануы үшін жауапкершілікке тарту міндеттелуі мүмкін.

Өзгерістер қашан күшіне енуі мүмкін?

Көлік министрлігі ұсынылып отырған өзгерістер қызмет көрсету сапасын арттыруға, жолаушылар құқығын қорғауды күшейтуге және әуе тасымалы ережелерін заманауи талаптарға сәйкестендіруге бағытталғанын атап өтті.

Бұйрық жобасы жария талқылау үшін "Ашық НҚА" порталында орналастырылған.

Google News арқылы жаңалықтарымызды қадағалаңыз

Жазылу