Доссордағы зейнеткердің қазасы бойынша іс сотқа жолданды

Марқұм Капитолина Симанькованың жиені Елена Рафикова істің қай кезеңде тұрғанын және сот қашан өтетінін білу үшін «Ақ Жайық» редакциясына жүгінген еді. Оның айтуынша, отбасы ұзақ уақыт бойы тергеу барысы туралы нақты ақпарат ала алмай келеді.

— Шаршап кеттік. Бәрі жауапкершілікті бір-біріне аударады, бөтен нөмірлер береді, олар тұтқаны көтермейді. Тіпті кімнің сараптама жүргізіп жатқанын да білмейміз, — деп жазды Рафикова бізге.

Редакция Атырау облыстық полиция департаментіне ресми сауал жолдады. Тергеу басқармасының бастығы Мұхтар Бектұрғанов қылмыстық істің 6 наурызда сотқа жіберілгенін хабарлады.

Сонымен қатар ол өзге мәліметтердің қолжетімділігі шектеулі ақпарат санатына жататынын және ҚР ҚПК-нің 201-бабына сәйкес жарияланбайтынын атап өтті. Қосымша деректер тек прокурордың рұқсатымен және ол мүмкін деп тапқан көлемде ғана жариялануы мүмкін.

Еске сала кетейік, 73 жастағы Капитолина Симанькованың денесі 19 ақпанда Доссор ауылындағы сарайдан табылды. Ол 13 қаңтардан бері байланысқа шықпаған. Әйел азаматтық күйеуі Владимир Маловпен бірге тұрған. 

Оның жоғалғаны туралы полицияға алғаш болып жиені Елена Рафикова хабарлаған болатын.

Полицияның мәліметінше, 9 ақпанда Мақат ауданында әйелдің хабар-ошарсыз кеткені туралы ақпарат түскен. Полицейлер оның тұрғылықты жеріне барып, үйді және аула аумағын тексеру барысында мәйітті тапқан.

Қылмыс жасады деген күдікпен марқұмның азаматтық күйеуі ұсталды. Ол тұрмыстық жанжал кезінде әйелге дене жарақатын салғанын мойындаған.

Капитолина Симанькованың өліміне байланысты Мақат аудандық полиция бөлімі ҚР ҚК-нің 106-бабы 3-бөлігі («денсаулыққа қасақана ауыр зиян келтіру, абайсызда жәбірленушінің өліміне әкеп соғу») бойынша сотқа дейінгі тергеу жұмыстарын жүргізген.

Айнұр САПАРОВА

Бүгін, 21:55