Дулат Исабековтің кітабы түрік тіліне аударылды

Түркияда көрнекті жазушы Дулат Исабековтің «Тіршілік» атты кітабы түрік оқырманына жол тартты. Қаламгердің таңдаулы шығармалары топтастырылған кітаптың тұсаукесер рәсімі Ыстамбұлдағы ең үлкен кітапханалардың бірінде өтті. 

Іс-шараға қатысқан түрік жазушылары мен зиялы қауым өкілдері қазақ әдебиетінің бүгінгі тынысы мен оны шетелде таныстыру мәселесін сөз етті. Сондай-ақ бауырлас екі ел арасындағы шығармашылық байланысты нығайту жолдары да талқыланды. Басқосуға жазушының ұлы Естияр Исабеков арнайы қонақ ретінде қатысты.

Естияр Исабеков, жазушының ұлы:

- Бүгінгі конференция биік деңгейде өтті. Әкемнің «Тіршілік» кітабының тұсаукесер рәсімі екі елдің көпірін жалғап, басын қосты. Өзімнің атымнан, отбасымның атынан үлкен ризашылығымды білдіргім келіп тұр. 

Ашур Өздемир, аудармашы:

- Өкінішке қарай, қазақ әдебиеті Түркияда әлі де жеткілікті деңгейде таныла қоймаған. Өзім Дулат ағаның жеті әңгімесін аудардым. Олардың төртеуі бірнеше жыл бұрын түрікше кітап болып басылып шықты. Бүгінгі жиында Дулат ағаның шығармалары арқылы қазақ әдебиетін түрік оқырмандарына тереңірек таныстыруды көздедік. Оқырмандар тарапынан қызығушылық өте жоғары болды.