ЕАЭО да ұлттық валютамен өзара есеп айырысу үлесі 93% ға жетті

АСТАНА, 22 сәуір – Sputnik. ЕАЭО-да ұлттық валютамен өзара есеп айырысу үлесі 93%-ға жетті. Бұл туралы Шанхайдағы II Еуразиялық қаржы-экономикалық форумында ЕЭК-тің экономика және қаржы саясаты министрі Бақыт Сұлтанов айтты.

Министр ЕАЭО тұрақтылық пен қаржылық тәуелсіздікке стратегиялық басымдық беріп отырғанын хабарлады. Ең басты көрсеткіш – елдер арасындағы есеп айырысуда ұлттық валюталарды қолдану бұрын-соңды болмаған рекордтық деңгейге жетті.

"Бүгін ЕАЭО елдері арасында тауарлар мен қызметтердің экспорты мен импорты бойынша өзара есеп айырысудағы ұлттық валюталардың үлесі 93%-ға жетті. Бұл жай ғана сан емес, одақ ішіндегі және біздің сыртқы серіктестермен, соның ішінде Қытаймен трансшекаралық төлемдер кезінде тәуекелдерді азайту және бірыңғай қаржы нарығын қалыптастыру жұмысының нәтижесі", - деді Сұлтанов.

Ол кәсіпкерлер мен инвесторларды ынтымақтастыққа шақырды.

"Өнеркәсіп саласындағы жобаларды жеңілдетілген қаржыландыру шарттары өте тартымды – субсидия негізгі мөлшерлеме көлемінде беріледі, бұл Еуразиялық алаңды жоғары технологиялық бизнес-бастамаларды іске қосу үшін бәсекеге қабілетті етеді", – деді министр.

Бұдан бөлек, ол іс-шараға қатысушыларды 28-29 мамырда Астанада өтетін Еуразиялық экономикалық форум мен "Антиконтрафакт-2026" халықаралық форумының алаңдарында диалогты жалғастыруға шақырды.