Елде 14,6 мыңнан астам шетел азаматы жұмыс істейді

Қазақстан аумағында жергілікті атқарушы органдардың рұқсатымен 2025 жылғы 1 қазандағы жағдай бойынша 14 666 шетел азаматы жұмыс істейді, деп хабарлайды Egemen.kz.

Фото: Ашық дереккөз

Еңбек және халықты әлеуметтік қорғау министрлігінің мәліметінше, шетел жұмыс күшін (бұдан әрі – ШЖК) тартуға рұқсаттардың арасында мынадай санаттар бар: басшылар мен олардың орынбасарлары үшін 561 рұқсат (бірінші санат), құрылымдық бөлімшелердің басшылары үшін 2 280 рұқсат (екінші санат). Тартылған ШЖК негізгі бөлігі үшінші (мамандар) және төртінші (білікті жұмысшылар) санаттарға жатады – тиісінше олар 3 884 және 988 адам. Сондай-ақ маусымдық жұмыстарға 3 036 адам, ал корпоративтік ауыстыру аясында 3 918 адам тартылған.

«Қазіргі уақытта Қазақстанда ШЖК пайдаланатын 1 896 жұмыс беруші бар. Оларда 339,1 мыңнан астам Қазақстан азаматы жұмыс істейді, бұл қызметкерлердің жалпы санының 96%-ы.Экономикалық қызмет түрлері бойынша ең көп жұмыс істейтіндер: құрылыс саласында – 4 799 адам, ауыл, орман және балық шаруашылығы – 3 065 адам, тау-кен өнеркәсібі және карьерлерді қазу – 1 187 адам, өңдеу өнеркәсібі – 1 085 адам», делінген хабарламада.

Айта кетейік, шетелдік мамандар негізінен Қытайдан (5 330 адам), Өзбекстаннан (2 682 адам), Түркиядан (1 046 адам) және Үндістаннан (1 012 адам) келіп отыр.

Ішкі еңбек нарығын қорғау мақсатында Еңбек және халықты әлеуметтік қорғау министрлігі жыл сайын республикаға тартылатын шетел мамандарына квота белгілейді. 2025 жылы бұл квота жұмыс күші санының 0,2 пайызы мөлшерінде, яғни 14,8 мың бірлік болып бекітілген. Ал, наурыз айынан бастап жергілікті органдардың өтінімдеріне сәйкес квота көлемі министрдің бұйрығымен 16,5 мың бірлікке дейін ұлғайтылған.

Сонымен қатар, тамыз айынан бастап маусымдық шетелдік жұмысшылар орындай алатын кәсіптер тізбесінің кеңеюіне байланысты министрдің бұйрығымен квота жұмыс күші санының 0,25 пайызына дейін, яғни 19,4 мың бірлік мөлшерінде  белгіленді.