Елде мұз жұқаруына байланысты алдын алу шаралары күшейтілді ТЖМ

Бұл туралы ТЖМ Төтенше жағдайларды жою департаменті басқармасының бастығы Магомет Ахриев мәлім етті. 

Оның айтуынша, құтқарушылар мен жергілікті бөлімшелер өзен-көлдерде тұрақты бақылау жүргізіп жатыр.

– Республика бойынша 30 мыңға жуық рейд ұйымдастырылды. 105 мыңнан астам азаматқа қауіпсіздік ережелері түсіндірілді. Оның ішінде 50 мыңға жуық балықшы арнайы нұсқама алды, – деді ол.

Дегенмен, қауіпсіздік талаптарын елемейтін жағдайлар әлі де тіркеліп отыр.

– Жыл басынан бері 40 адам құтқарылды. Оның ішінде 15-і – балалар. Көп жағдайда адамдар жұқа мұзға шығып, өз өміріне қауіп төндіреді. Өкінішке қарай, қараша айынан бері мұз қату кезеңінде елімізде 8 адам қаза болды, – деді Магомет Ахриев.

Оның мәліметінше, қазіргі уақытта оңтүстік өңірлерден басқа аймақтардың басым бөлігінде өзен-көлдер әлі мұз құрсауында. Алайда мұздың беріктігі әлсіреп, қауіпті кезең басталған.

– Осыған байланысты ірі өзендерге ерекше назар аударылып отыр. Атап айтқанда, Есіл, Ертіс және Жайық өзендері маңында бақылау күшейтілді. Бұл жерлерде адамдар жиі жиналатындықтан, қауіп те жоғары, – деді ол.

Осыған байланысты ТЖМ мамандары тұрғындарды су айдындарында сақ болуға және жұқа мұзға шықпауға шақырады.

Айта кетейік, елдің бірқатар өңірінде су тасқынының алдын алу үшін өзендерде мұз жару жұмыстары жүргізіліп жатыр.