ШҚО да орманды заңсыз кесудің алдын алу шаралары күшейтілді

Qazaq24.com, 24.KZ дереккөзінен алынған ақпаратқа сүйене отырып жаңалық таратты..

Шығыс Қазақстан облысында орманды заңсыз кесудің алдын алу үшін күзет шаралары күшейтілді.

Табиғат жанашырлары мен орманшылар қылқан жапырақты ағаштарды жіті бақылауға алып, шалғай аудандарда арнайы блок-бекеттер қойылды. Облыс аумағында орман қоры 3,5 млн гектарға жуық жерді алып жатыр. Осы аумақтарды сақтау үшін құрылған мобильді топтар бекітілген аймақтарды күн сайын аралап, әсіресе орманды алқаптарға кіріп-шығып жүрген жүк көліктерін тексеруде.

Шығыс Қазақстан облысындағы орман алқаптары жерден де, көктен де бақыланады. Қазір мамандар қарда жүретін техникамен де, ұшу апараттарымен де қамтылған. Өңірдің басты байлығы – қылқан жапырақты ағаштар. Сондықтан инспекторлар күн сайын рейдтік шаралар ұйымдастырып, орман күзетін күшейтіп отыр. Одан бөлек түз тағылары да назарға алынды. Өйткені кейбір елді мекендерде түлкілердің шабуылы тіркелген.

Мұрат Райысов, Өскемен орман шаруашылығының қызметкері:

- Түлкі егер қартайған жағдайда оны аулап жей алмайтын жағдайда өзіне жеңіл тамақ табуы үшін қораға түсуі мүмкін. Ол бір дәндеп алған түлкі қайта – қайта келіп, сол құстарды құртып жүрген болуы мүмкін деп ойлаймыз.

Қазір заңсыз ағаш кескендерге қатысты заң күшейтілді. Мысалы, бір шырша үшін 59 мың теңгеге әкімшілік хаттама толтырылады. Ал төртеуін қатар отағандар қылмыстық жауапқа тартылады. Мысалы, Тарқан ауылы маңында 35 мың гектар орман қоры бар. Бұл аумақты 24 адам бақылайды.

Алғабай Асқабұлов, Қатон-Қарағай ұлттық паркінің орман қорғау және өндіру бөлімінің бастығы:

- Қорғауды жүйелі жүргізу мақсатында – аудандық ПБ қызметкерлерімен бірлесіп, 11 ұтқыр тез қимылдайтын топтар құрылды. Техникалар жиі жүретін жолдардағы 2 орынға қадағалау өткізу пунктері қойылып, ол жерде тәулік бойғы кезекшілік ұйымдастырылды.

Өңірде орман қорын ұлғайту жұмыстары жалғасып жатыр. Биыл облыс бойынша 15 мың жас көшет егілді. «Бұл қоршаған ортаны көгалдандырып, жасыл алқапты молайтуға мүмкіндік береді», - дейді табиғат жанашырлары.

Айдарбек Айтмұхамбетұлы, Вячеслав Ветлугин

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.