Елдегі балалар колониясында 80 ге жуық жеткіншек жазасын өтеп жатыр

Бүгінде жасөспірімдер арасындағы қылмыс артпаса, кемімей отыр. Былтыр елдегі балалар колониясында 50-ге жуық жеткіншек жазасын өтесе, биыл олардың саны 80-ге жуықтады.

Жартысынан астамы ауыр қылмыс жасаған. Қалған 27-сі аса ауыр қылмысқа барғандар. Көбі шалыс басқан қадамына өкінеді. Ата-анасы мен жақындарын сағынады. Басқаларға сабақ болса екен дейді. Мектеп қабырғасында жүрген кезінде өзінен кіші оқушыларға әлімжеттік көрсетіп, ақша бопсалағандардың бірі арнамызға эксклюзивті сұхбат берді.

Балалар колониясында жазасын өтеуші:

- 5 сыныптан бастап мектеп инспекторының есебінде тұрдым. Қара тізімде тұрдым. Мектеп инспекторларының айтқан сөзіне құлақ салмадым. Олар маған түсіндіріп, «сотталасың, бұзықтық жасама» деп айтты. 9 сынып оқып жүрген кезімде өзімнен кіші сыныптағы оқушыларға әлімжеттік жасап, ақша бопсалап, жұмсайтынмын. Арты түрмеге әкеліп соғады деп ойламадым. Артымнан өсіп келе жатқан жігіттер, балалар, мектеп оқушылары сендерге айтарым, ата-аналарынды сыйландар. Олардың үмітін ақтандар. Мұғалімдердің айтқанын тыңдаңдар.

Айта өткен жөн, 110 орынға шақталған бұл түзету мекемесінде мектеп бөлімі мен колледж филиалы жұмыс істейді. Жасөспірімдер металл жонушы, дәнекерлеуші, шаштараз және тігін шебері сияқты мамандықтар бойынша білім алу мүмкіндігіне ие. Биыл маусым айында 20-дан астам түлек оқуын тәмамдап, қолына аттестат алды.