Елдегі еңбек нарығы трансформацияланып жатыр

Елдегі еңбек нарығы трансформацияланып жатыр. Өзгерістердің нәтижесінде халықты жұмыспен қамту мәселесі шешілуге тиіс.

Бұған дейін Мемлекет басшысы 2030 жылға қарай 3,3 млн адамды жұмысқа орналастыру міндетін қойған еді. Жауапты ведомство бұл бағытта қандай жұмыстарды атқарып үлгерді? 

Еңбек нарығын тиімді басқару – тұрақты экономикалық дамуда және азаматтардың әл-ауқатын арттыруда негізгі рөл атқарады. Сондықтан оның трансформациялануы қалыпты жағдай. Мемлекет басшысы бұған дейін 2030 жылға қарай 3 млн-нан астам адамды, оның ішінде 2,3 млн жасты тұрақты жұмыс орнымен қамтуды тапсырған еді. Осыған қатысты 2023 жылы тиісті жоспар бекітіліп, жыл сайын 480 мыңға жуық азаматты қарекетпен қамтамасыз ету көзделген.

Нысанбай Сисен, ҚР ЕХӘҚМ Халықты жұмыспен қамту департаментінің бас сарапшысы:

- Жыл сайын 480 мыңға жуық азаматты жұмысқа орналастыру декомпозициясы бекітілген. Бүгінгі таңда 1 желтоқсандағы жағдайға сәйкес, 820 мыңға жуық азамат жұмысқа орналастырылды. Оның ішінде жастардың үлесі 376 мың немесе 46 пайыз. Жалпы 2024 жылдың қорытынды кезеңімен салыстырғанда 979 мың адам жұмысқа орналасса, оның ішінде жастардың үлесі 428 мың адам.

Саланы цифрландыру деңгейі жаман емес. Қазір екі қолға бір күрек іздегендер де, жұмыс берушілер де үйлерінен шықпай-ақ, Enbek.kz порталынан қажеттіліктерін таба алады. Бұдан бөлек, Skills.enbek.kz пен Hr.enbek.kz платформалары тараптар үшін тиісті мүмкіндік беріп отыр.

Олжас Омар, Астана қаласы «Еңбек мобильдігі орталығы» КММ директоры:

- Жалпы Enbek.kz порталында жұмыс берушілер бос жұмыс орындарын тіркей алады. Жұмыс іздеушілер түйіндеме қалдыра алады. Бұдан басқа Skills.enbek.kz порталында онлай тегін түрлі оқыту жалпы жаңа дағдыларды алуға болады. Жұмыс іздеушілер тарапынан 6 мыңнан астам түйіндеме жарияланған.

Бүгінде электронды еңбек биржасы порталында жұмыс берушілерден 70 мыңға жуық бос жұмыс орындары орналастырылған. Өңірлік бөліністе Астана, Алматы, Шымкент қалалары мен Қостанай, Павлодар облыстарында жұмыс күшіне қажеттілік бар. Ең жоғары сұраныс білім, өндіріс және қаржы бағыттарымен қоса, біліктілікті талап етпейтін салаларға тиесілі. Қазір порталда аула сыпырушы, сантехник және тазалықшы мамандары үшін 12 мыңға жуық вакансия орналастырылған.

Авторлары: Альмира Оразбай Руслан Алиев