Елдегі суперкомпьютер қай салалардағы мәселелерді шешуге ықпал етеді

- «Alem.Cloud» ұлттық суперкомпьютер кластері Мемлекет басшысының тапсырмасы бойынша Жасанды интеллект және цифрлық даму министрлігіне қарасты «Ұлттық ақпараттық технологиялар» АҚ инфрақұрылымының негізінде құрылған. Суперкомпьютер жасанды интеллект, жоғары өнімді есептеулер және үлкен деректерді талдау бағыттарындағы жобаларды іске асыруға арналған. Кластердің архитектурасы жоғары тығыздықтағы бірыңғай GPU-кешеніне біріктірілген 64 HPE Cray серверінің базасында іске қосылған. Әрбір есептеу торабы жоғары жылдамдықты қамтамасыз ететін NVIDIA H200-бен жабдықталған. Alem.Cloud ресурстары енді заңды тұлғаларға қолжетімді. Атап айтқанда, мемлекеттік органдар, ғылыми және білім беру ұйымдары, стартаптар, жеке компаниялар, сондай-ақ Astana Hub резиденттері ресурстарды пайдалана алады. Министрлік жасанды интеллектіні дамытудың ұлттық міндеттері мен жобалардың стратегиялық маңызын ескере отырып, суперкомпьютер ресурстарын бөлу ережелерін әзірледі, - делінген министрліктің Kazinform агенттігіне берген жауабында.

Суперкомпьютерді пайдаланудың басым бағыттарына мемлекеттік басқару, білім беру, денсаулық сақтау, ауыл шаруашылығы мен су ресурстары, мұнай-газ саласы, тау-кен металлургия кешені, энергетика, геология және барлау, көлік пен логистика, өнеркәсіп және құрылыс, робототехника мен дрондар, киберқауіпсіздік, сондай-ақ қаржылық технологиялар кіреді.

- Платформа арқылы өтінім беру үшін қолданушы сілтемеге өтіп, қажетті ресурстардың көлемін (GPU), CPU, RAM, SSD таңдайды. Сондай-ақ жалға алу мерзімін көрсетеді және жобаның сипаттамасын енгізеді. Платформада қажетті конфигурацияны есептеп, құнын шығаратын арнайы калькулятор қарастырылған. Әрбір өтінім заңды тұлғаның электрондық цифрлық қолтаңбасымен расталады. Ұлттық суперкомпьютер есептеу ресурстарының тұрақты әрі үздіксіз жұмысын қамтамасыз етеді. Қызметтер тәулік бойы қолжетімді, деректер резервтік көшірмелермен қорғалған, ал SLA талаптарының сақталуы жүйенің қолжетімділігі мен түсінікті болуына кепілдік береді. Бұл компаниялар мен ұйымдарға өз жобаларын сенімді түрде жоспарлап, тиімді жүзеге асыруға көмектеседі, - деп аталып өткен ведомство ақпаратында.

Бұл тұрғыда жасанды интеллект сервистерін азаматтар, бизнес және мемлекеттік аппарат үшін енгізу жұмыстары жалғасын табады. Аталған нәтижелер ұлттық үлкен тілдік модельдер мен суперкомпьютер қуаттарын пайдалану арқылы қол жеткізілді.

Еске салсақ, былтыр шілде айында Мемлекет басшысы Қасым-Жомарт Тоқаев суперкомпьютерді іске қосу рәсіміне қатысты.