ЖИ жолдағы апатты азайтуға ықпал етеді

Президент «Түркістан» газетіне берген мақаласында көлік апатына қатысты пікір білдірді.

Мемлекет басшысы қайғылы жағдайдың алдын алу, көлік апатын азайту мақсатында құзырлы органдар тарапынан тиісті іс-шаралар қолға алынғанын атап өтті.

Алайда бұл іске қоғам немқұрайлы қараса, еш нәтиже шықпайтынын да тілге тиек етті. Сондықтан жүргізушілердің осыны жете түсініп, жол ережесіне жауапкершілікпен қарағаны маңызды.

Жолдағы қауіпсіздік елдегі күрмеуі қиын мәселеге айналды. Өкінішке орай, былтыр жол-көлік оқиғасы 14 пайыз көбейді. Ал жарақаттанғандар саны 20 пайызға өсті. Десе де, апат салдарынан опат болғандар 10 пайызға жуық азайды. Мамандар қайғылы жағдайлардың басым бөлігі қарапайым жол ережесін сақтамаудың кесірінен болады дейді.

Айдын Оразбаев, ҚР ІІМ Әкімшілік полиция комитеті басқармасының бастығы:

- Жылдамдықты сақтамау, жолдың қарсы бағытына шығу, қауіпті маневрлар жасау, сол сияқты жол-көлік қағидаларын бұзудың салдарынан болады.  Статитискаға келетін болсақ, жол-көлік оқиғалары негізінен елді мекендерде болады. 84 пайыз жол-көлік оқиғалары осы елдімекендерде жасалады.  

Былтыр елде жолаушы жапа шеккен 36 146 жол-көлік оқиғасы тіркелді. Салдарынан 49 220 адам жарақат алып, 2330-ы опат болды. 

КӨЛІК АПАТЫ

Барлығы – 36 146

49 220 адам жарақат алды

2 330 адам опат болды

Күн райы бұзылған кезде жол ережесін сақтау маңызды. Әсіресе қыс мезгілінде. Қауіпсіздікті қамтамасыз ету үшін жауапты органдар жылдамдықты уақытша шектеп, қажет болса, жолдарды жабады. Алдын ала хабарлама беріледі. Ал жолға шығып кеткен жүргізушілер арнайы таблодан көріп-біледі.

Ақтоты Боранова, ҚР ІІМ Әкімшілік полиция комитетінің ресми өкілі:

- Астана - Щучинск және Астана - Теміртау бағыттарында ауа райы нашарлаған кезде ғана жылдамдықты төмендетуге мүмкіндік беретін электронды таблолар, яғни ауыспалы ақпарат беру белгілері қойылған. Бұл белгілер боран, көктайғақ сияқты қолайсыз жағдайларда уақытша шектеулер енгізуге қолданылады. Аталған белгілер стандарт талаптарына толық сәйкес орнатылған және басқа жол белгілері сияқты міндетті түрде сақталуға тиіс. 

Енді жолдағы апатты азайтуға жасанды интеллект ықпал етпек. Заманауи құрылғының көмегімен көлік жылдамдығы қадағаланып, жаяу жүргіншілердің жолдан қауіпсіз өтуі бақыланады. Тың жобалар алдағы уақытта жемісін беруі тиіс дейді жауаптылар.

Нұрқанат Қанапия, Марат Диханбаев