Елдің ішкі саясатты бірлік пен әділет, еңбекқорлық төңірегінде қалыптасуда

Мемлекет басшысы Қасым-Жомарт Тоқаев «Қазақстан Республикасы ішкі саясатының негізгі қағидаттары, құндылықтары мен бағыттарын бекіту туралы» Жарлыққа қол қойды, деп хабарлайды Arasha.kz.

Бұл құжат – елдің ішкі саясат саласындағы барлық бағыттағы жұмысты жүйелеуге арналған тұжырымдамалық негіз.

Аталған бастама Ұлттық құрылтайдың IV отырысында көтерілген болатын. Сарапшылар мен қоғам қайраткерлері ішкі саясатты біріздендіретін бірыңғай құжат қажет екенін атап өткен еді. Президент бұл ұсынысты қолдап, оның мемлекеттік органдар қызметін нақты бағыттауға сеп болатынын айтқан.

Жаңа құжатты дайындау кезінде Президенттің жыл сайынғы Жолдаулары, сөйлеген сөздері, сондай-ақ Қазақстанның 2029 жылға дейінгі ұлттық даму жоспары ескерілген.

Тұжырымдаманы әзірлеуге Ұлттық құрылтай мүшелерімен қатар, сарапшылар, ғалымдар және қоғамдық ұйымдар белсене қатысқан.

Құжат мемлекеттік органдарға арналған және оның негізгі мақсаты – ішкі саясат саласындағы жұмыстарды жүйелеу мен үйлестіру.

Онда ел дамуының басты қағидаттары айқындалған:

«Заң және тәртіп»,

«Халық үніне құлақ асатын мемлекет»,

«Түрлі көзқарас – біртұтас ұлт»,

«Күшті Президент – ықпалды Парламент – есеп беретін Үкімет»,

«Адал азамат»,

«Таза Қазақстан».

Сонымен қатар, Ұлттық құрылтай отырыстарында көтерілген жалпыұлттық құндылықтар мен ұлттық нышандар жүйесі де енгізілген.

Құжатта ішкі саясаттың негізгі бағыттары айқындалды:
қоғамдық диалогты дамыту, этносаралық келісім, дін және мәдени-гуманитарлық сала, отбасы мен жастар саясаты, ақпараттық кеңістік.

Жаңа тұжырымдамалық құжат мемлекеттік органдардың ішкі саясаттағы жұмысын үйлестіру мен қоғаммен өзара іс-қимылды күшейтуге негіз болады.