Елге жарты жылда 4 млн турист келді

Қазақстанда туризмнің жаңа түрлері қанат жайып келеді. Мәселен, кейінгі жылдары Арал теңізінің табанына барып, табиғи апаттың салдарын көруге ынтық шетелдіктер көбейген.

«Елімізде дәл осы секілді тұмса табиғаты мен топырағы тарих тұнған орындар жетерлік. Саланы дамытуға әлеует те бар», - дейді мамандар.

Шетелдік саяхатшыларды еліміздің тұмса табиғаты ғана емес, бай тарихы қызықтырады. Жарты жылда қазақ жеріне табан тіреген жиһанкездердің жалпы саны  4 млн-нан асты. Бұл жылдағыдан 500 мың адамға көп. Әсіресе Арал теңізі секілді табиғи апат орындарын көргісі келетін туристер қатары артып келеді. Мамандар бұл дарк-туризмнің дамуына жол ашты дейді. Қазақстанда қазір дәл осындай 4 нысан бар. Бұдан бөлек, шетелдік саяхатшылар арасында өнеркәсіптік және гольф туризмге сұраныс жоғары.

Базарбек Қамысбаев, «Астана туризм» туризмді дамыту орталығының департамент директоры:

- Біз осы жылдан бастап өнеркәсіптік және гольф туризмге аса үлкен көңіл бөліп жатырмыз. Осы жақында ғана Үндістаннан келген туроператорларға арнап, қаладағы гольф клубты және Ақмола облысы Бурабайдағы гольф клубтарды таныстырып ақпараттық танымдық тур өткіздік. Сонымен қатар өнеркәсіптік туризм туралы айтар болсақ, Астана қаласында орналасқан 6 мекеме бойынша оқыту-семинарларын өткіздік.

Елге аяқ басқан турист үшін алдымен жайлылық керек. Осы себепті  бірқатар қызмет түрі бүгінде цифрлық форматқа ауыстырылды. Мәселен, туристерді тіркеуді жеңілдету үшін «eQonaq» ақпараттық жүйесі іске қосылды. Қосымшаны қазір жарты миллионға жуық азамат пайдаланған. Жүйе әсіресе, шетелден келген қонақтар үшін таптырмас құрал. Біріншіден, туристерді тіркеу міндеті оларды күтіп алатын тұлғаларға жүктелді. Яғни, шетелдіктерді қонақ үй, пәтер иесі немесе туыстар жүйеге тіркеуі шарт. Екіншіден, туристердің санын білуге мүмкіндік береді. Сонымен қатар қонақтар үшін TaxFree жүйесі де  енгізілді. Бұл шоппинг туризмді дамытуға арналған.

Айнұр Нұртаева, сарапшы:

- Бізде тағы бір туристік бағыт қосылды, ол - тур пойыз. Ол Қазақстан мен Өзбекстанның арасын қосып тұрған кезіндегі тарихи Жібек жолы деп атадық. Қазақстан мен Өзбекстан арасын қосып тұр. Өте әдемі бағыт. Қазір міне, бесінші рет жібергелі жатырмыз тур пойызды.

Әу бастан шетелдік қонақтар үшін тартымды болған ару қала Алматының ел туризмін түлетуде орны ерек. Мегаполиске бір жылда шамамен миллионнан астам қонақ келген. Оған әлем жұлдыздарының  Алатау баурайында концерт беріп, Реал Мадрид секілді атағы жер жарған футбол клубының ат басын бұруы әсер етті. Сарапшылар осы секілді ірі халықаралық шараларды көптеп өткізу оқиғалық туризмді дамытуға зор серпіліс болғанын айтады.

Авторы: Назерке Тоқжан