Еліміздің ең үздік федерациясы анықталды

50-ден аса тарихи жетістік. Қазақстандық спортшылар үшін 2025 жыл салыстырмалы түрде сәтті өтті.

Әсіресе бокста, дзюдода, шорт-трек пен семсерлесуде қазақ қыз-жігіттері сенсациялық жеңістерге жетіп, 50-ден аса тарихи жетістік тіркеген. Бұл жөнінде Туризм және спорт министрі Ербол Мырзабосынов мәлімдеді.

Алуа Балқыбекова – жылдың үздік спортшысы

Алуа – жылдың үздік спортшысы. Туризм және спорт министрлігі биылғы жылды қорытындылап, елдегі ең үздік спортшыны анықтады. Бұл құрметке бокстан екі дүркін әлем чемпионы Алуа Балқыбекова лайық деп танылды. 51 келіде өнер көрсететін алматылық қыз бір жылдың ішінде екі мәрте дүниежүзілік додада топ жарды. Атап айтқанда, көктемде Сербияда Халықаралық бокс қауымдастығының әлем чемпионаты ұйымдастырылып, Алуа өз салмағында барлық қарсыласын ұтқан болатын. Ал күзде Англияда Әлемдік бокс ұйымының чемпионаты өтіп, Алуа тағы да өз мықтылығын дәлелдеді. Бұған қоса, ол екі дүркін Азия чемпионы атанды. Енді Алуа алдағы жылы Азия Ойындарында да осы жетістігін қайталағысы келеді. Бұған қоса, 2028 жылы АҚШ-та өтетін олимпиада ойындарында топ жаруды армандайды. Тағы бір айта кетерлігі, Алуаның жеке бапкері Долкунжан Комековке дәл осы салтанатты шарада «жылдың үздік бапкері» деген арнайы аталым бойынша сыйлық табысталды.

Еліміздің ең үздік федерациясы анықталды

Қазақстан бокс федерациясы – жылдың үздік федерациясы. Туризм және спорт министрлігі биылғы жылды қорытындылап, үздік спортшылар және үздік бапкерлермен қатар үздік спортқа жауапты ұйымға да арнайы марапат дайындады және бұл құрметке Шахмұрат Мүтәліп жетекшілік ететін Қазақстан бокс федерациясы лайық деп танылды. Салтанатты шарада арнайы сыйлық федерация президентіне табысталды. Айта кетейік, расымен де боксшыларымыз үшін биыл өте сәтті жыл болды. Барлық дерлік жарыста жоғары нәтиже тіркеп, жалпы есепте топ бастады. Оның ішінде ересектер арасындағы екі бірдей әлем чемпионаты бар. Әлем Кубоктарында да өте жақсы өнер көрсетті. Бұған қоса, қазақстандық жастар мен жсөспірімдер де Азия чемпионаты мен Азия ойындарында және Әлем біріншілігінде жеңістерімен қуантты.

Шахмұрат Мүтәліп, Қазақстан бокс федерациясының президенті:

- Қазақстан бокс федерациясында әртүрлі бағыттар бойынша білікті мамандар қызмет етеді. Олардың арасындағы ауызбіршілік пен жүйелі жұмыстың арқасында үлкен жетістіктер тіркелді. Бұған қоса әрине, мемлекеттің қолдауын да ерекше атап өту керек. Алда әлі үлкен мақсаттар тұр. Алдағы жылы Жапонияда Азия ойындары өтеді. 2027 жылы Астанада Әлем чемпионаты және 2028 жылы Лос- Анджелесте Олимпиада жарысы бар. Сондықтан осы қарқынды жоғалтпай, жеңіс жолын жалғауға тырысамыз.  

ҚХЛ: «Барыс» тағы да жеңілді

«Барыс» тағы да жеңілді. Астаналық команда құрлықтық хоккей лигасы аясындағы кезекті кездесуін өз алаңында өткізіп, ұпай еншілей алмады. Михаил Кравец баптайтын жігіттер бұл жолы Омбы қаласының «Авангард» клубын қабылдаған болатын. Қонақтар ойын басталмай жатып фаворит саналды. Сәйкесінше, матч барысында да «Барыс» қақпасына 4 шайба соқты. Қорытынды есеп: 1:4. Жеңіске жеткен «Авангард» турнир тізімінде, яғни, Шығыс Конференциясында 3-орынға жайғасты. Ал «Барыс» 9-шы сатыға төмендеді. Енді қазақстандық клуб ертең өз алаңында кезекті кездесуін өткізеді. Бұл жолы Хабаровск қаласының «Амур» хоккей кубымен жолағады.