Әлемдегі ең үздік зәулім ғимарат анықталды

Бұрынғы атауы Биік ғимараттар және қалалық орта жөніндегі кеңес (CTBUH) болған Тік урбанизм кеңесі (Council on Vertical Urbanism, CVU) 2025 жылдың «Әлемдегі ең үздік биік ғимараты» атағын Брюссель қаласындағы ZIN in No (o)rd жобасына берді. Бұл туралы агенттік шетелдік БАҚ-тарға сілтеме жасап хабарлады.

Канаданың Торонто қаласында өткен Кеңестің жыл сайынғы халықаралық конференциясында ресми хабарландыру жасалды. Әлемнің түкпір-түкпірінен келген жетекші сәулетшілер, инженерлер мен урбанистер 24 елден түскен өтінімдердің арасынан 111 метрлік ZIN in No (o)rd жобасын таңдады.

Ол ғимарат 1970-жылдары салынған ескі кеңсе кешенінен қайта жаңартылып, кеңселер, тұрғын үйлер, қонақүй және қоғамдық орындар біріктірілген көп қызметті заманауи ғимаратқа айналды. Осылайша, ол адамдар жұмыс істей алатын, тұра алатын және демала алатын біртұтас «тік экожүйеге» айналды. Осындай тиімді әрі заманауи түрлендіруі үшін жоба жоғары бағаланды.

Бастапқыда бұл ғимарат екі бөлек мұнарадан тұрған. Кейін үшінші биік құрылыс қосылып, олар бір үлкен кешенге біріктірілді. Қайта жаңарту кезінде ғимаратқа көп жасыл аймақтар (ағаштар, бақтар) қосылып, энергияны аз пайдаланатын заманауи технологиялар орнатылды. Сондықтан бұл жай ғана ғимарат емес, еуропалықтардың ескі үйлер мен кеңселерді қазіргі заман талаптарына сай, экологиялық таза әрі ыңғайлы етіп қайта жасау арманының нақты үлгісі саналады.

Сонымен қатар, ғимараттың негізгі құрылыс бөліктерінің 85%-ы — оның ішінде іргетасы мен жерасты қабаттары — сақталған. Құрылыс материалдарының 60%-нан астамы қайта қолданылған, ол материалдар дәл сол жерде немесе басқа жобаларда пайдаланылады. Бұл тәсіл парниктік газдардың шығарындыларын айтарлықтай азайтып, Еуропадағы үлкен көлемдегі қайта құру жобаларына жаңа стандарт орнатуға мүмкіндік берді.

Бұдан бұрын CNN Travel Алматыны әлемдегі ең үздік туристік бағыттардың бірі ретінде атады.