Елорда мектептерінде ас мәзірі жаңарды: оқушыларға ұлттық тағам беріледі

Жаңа мәзірді ҚР Оқу-ағарту министрлігі мен Денсаулық сақтау министрлігі бірігіп әзірлеген мектептегі тамақтанудың жаңа стандартының күшіне енуіне байланысты жүзеге асырылды. 

Аталған стандарт балалардың жас ерекшеліктерін, физиологиялық қажеттіліктерін және заманауи тағамтану талаптарын ескере отырып әзірленді. Сондай-ақ қазақ тағамтану академиясының сарапшылары қатысып, ғылыми негізделген ұсыныстар енгізді.

Жаңартылған ас мәзірінің басты ерекшелігі – оның теңгерімділігі мен пайдалы құрамының артуы. Рационда ет, балық, құс еті, сүт өнімдері, сондай-ақ жаңа піскен көкөністер мен жемістердің үлесі көбейтілген. Бұл балалардың ағзасын қажетті ақуыздармен, дәрумендермен және микроэлементтермен қамтамасыз етуге мүмкіндік береді.

Сонымен қатар денсаулыққа зиян келтіруі мүмкін өнімдер мәзірден алынып тасталды. Атап айтқанда, тұз, қант және қаныққан майлар мөлшері жоғары тағамдар, шұжық өнімдері, фастфуд (пицца, хот-догтар), құрамында қосылған қанты бар шырындар, спредтер және консерванттары бар өнімдер енді ұсынылмайды.

Жаңа мәзірде ас құрамында еттен, балықтан немесе құс етінен дайындалған ыстық тағамдар бар. Сонымен бірге тұтас дәнді дақылдар, көкөністер, жемістер мен сүт өнімдерін кеңінен пайдалану көзделген.

Астана мектептерінде сондай-ақ мектеп тамақтануына ұлттық компонент енгізу бастамасы іске асырылуда. Бұл «Ұлттық мектеп асханасы» жобасы аясында жүзеге асып, оқушыларды дәстүрлі тағамдармен таныстыруға мүмкіндік береді. Яғни, аптаның бір күнінде оқушыларға қазақтың ұлттық тағамы – асылған ет те беріледі.

Жаңартылған мәзірдің сақталуын бақылау бірнеше деңгейде жүргізіледі. Бұл міндет мектеп әкімшіліктеріне жүктеліп, Астана қаласының Білім басқармасы тарапынан үйлестіріледі. Сонымен қатар ата-аналар қауымдастығы өкілдері кіретін бракераждық комиссиялар да мониторинг жүргізеді.

Жалпы алғанда, мектеп ас мәзірін жаңарту – білім беру жүйесіндегі маңызды реформалардың бірі. Ол оқушылардың денсаулығын жақсартуға, дұрыс тамақтану әдетін қалыптастыруға және мектептегі білім беру ортасының сапасын арттыруға бағытталған жүйелі шара саналады.

Айта кетейік, бұдан бұрын Қазақстан Қарулы күштерінде әскери қызметшілерді тамақтандыру жүйесін жаңғыртуға бағытталған жаңа стандарттар енгізіліп жатқанын жазғанбыз.