Елордада ерлікпен қаза тапқан жас маманға ескерткіш тақта қойылды

Астанада қалалық жедел медициналық жәрдем станциясы ғимаратының қабырғасына қызметтік міндетін орындау барысында қаза тапқан фельдшер Ұлдана Мырзуанға арналған ескерткіш тақта қойылды. Бұл туралы елорда әкімдігінің ресми сайты хабарлады.

Салтанатты рәсімге Денсаулық сақтау министрі Ақмарал Әлназарова, марқұмның анасы Сәлима Ишанқұлқызы, туыстары, жедел жәрдем станциясының қызметкерлері және медицина саласының өкілдері қатысты. Министр өз сөзінде Ұлдана Қалдарханқызының кәсіби адалдығы мен біліктілігін атап өтіп, оның есімі отандық медицина тарихында жазылатынын жеткізді. Сонымен қатар, марқұмның туыстарына және әріптестеріне көңіл айтты.

Ұлдана Мырзуан 2017–2021 жылдары Астанадағы «Даналық» колледжінде фельдшер мамандығы бойынша білім алып, үздік дипломмен бітірген. Оқу орнынан кейін төрт жыл бойы қалалық жедел медициналық жәрдем станциясында еңбек етіп, кәсіби шеберлігімен көзге түскен. Оның құрметіне колледжде арнайы аудитория ашылатын болды.

Ескерткіш тақта ашылғаннан кейін жедел жәрдем станциясының қызметкерлері гүл шоқтарын қойып, марқұмның рухына Құран бағышталды.

Еске сала кетейік, фельдшер Ұлдана Мырзуан қызметтік міндетін атқару кезінде ауыр жарақат алып, 18 қараша күні ауруханада қайтыс болған еді.

Бүгін, 15:03