Анкарада қазақ офицеріне ескерткіш тақта орнатылды

Анкарада қазақ офицеріне арналған ескерткіш тақта ашылды. Мемориал Түркия құрлық әскерінің академиясында бой көтерді.

Салтанатты рәсімге Қазақстанның Қорғаныс министрі Дәурен Қосанов қатысты. Ведомсто басшысы сапар аясында түркиялық әріптесі Яшар Гүлермен кездесіп, әскери ынтымақтастықты нығайтуға бағытталған бірқатар уағдаластыққа қол жеткізді.

Түркиядағы әскери жоғары оқу орнында ескерткіш тақта халықаралық бітімгершілік миссиясында ерлікпен қаза тапқан қазақ офицері Қайрат Құдабаевқа ашылды. Бұл – тек бір сарбаздың рухына тағзым емес, бүкіл қазақ бітімгерлеріне көрсетілген құрмет. Себебі Қайрат Құдабаев халықаралық қауымдастықтың бейбітшілігі үшін жанын қиды.

Арада 20 жыл өтсе де, капитан Құдабаевтың Ирактағы ерлігі ел жадынан өшкен жоқ. Жарылғыш заттарды эвакуациялау кезінде өз өмірін құрбан етіп, өзге сарбаздарды аман алып қалды. Осы жанқиярлығы оның білім алған әскери академиядағы арнайы мемориалға қашап жазылды. Ескерткіш тақтаның ашылу рәсіміне Астанадан арнайы келген батырдың отбасы да қатысты.

Әсем Қайырқанқызы, Қ. Құдабаевтың жары:

- Бүгін біз үшін өте маңызды әрі ерекше күн. Біздің отбасымыз үшін бұл мемориалдың ашылуы – ерлік пен ар-намыстың символы. Балаларым үшін – әкелерінің рухына деген мақтаныш. Ал осы оқу ордасының жас курсанттары үшін бұл нағыз патриотизмнің үлгісі деп білемін.

Әмина Құдабаева, Қ. Құдабаевтың қызы:

- Біздің әкеміз есімізде өте патриот, елін сүйетін, ісіне адал тұлға ретінде сақталып қалған. Жалпы осындай іс-шара болғанына өте қуаныштымыз. Алғысымыз шексіз.

Қайрат Құдабаев – осы әскери академияны тәмамдаған алғашқы қазақстандық түлек. 1996 жылдан бері бұл оқу орнын 150-ге жуық қазақстандық сарбаз бітірген. Қазір 80-нен астам курсант тәлім алып жүр.

Өлке Ердалы, Түркия Құрлық әскерлері әскери академиясының курсанты:

- Біз болашақ офицерлер ретінде артылған міндет пен жауапкершілікті абыроймен атқаруға және елімізге қаймықпай абыроймен қызмет етуге тырысамыз. Бұл біздің міндетіміз. Міндетімізді әрқашан оғары дәрежеде жасауға тырысамыз.

Қорғаныс министрі болашақ офицерлермен кездесіп, академиядағы оқу процесі, халықаралық дайындық стандарттарымен танысты. Елге адал қызмет етудің маңыздылығына тоқталды. Екі күнге созылған сапар Қазақстан мен Түркия арасындағы әскери ынтымақтастықты тереңдетуге, бітімгершілік бағытындағы өзара іс-қимылды күшейтуге жаңа серпін берді.

Авторлары: Әсия Нұрлыбаева, Ж.Сүйіндіков