Елордада лицензиясыз ішімдікке қарсы рейд жүргізілді

Елордада алкоголь өнімдерін заңсыз сатуға қарсы шаралар жүргізіліп жатыр.

Биыл лицензиясыз және кәмелетке толмағандарға ішімдік ұсынғаны үшін 200-ге жуық кәсіпкер жауапкершілікке тартылған. Бүгін құзырлы орган өкілдері кезекті рейд жүргізді.

Биыл тек Сарыарқа ауданы бойынша 47 мыңға жуық бөтелке ішімдік тәркіленген. Сондай дүкендердің біріне біз де құзырлы органдармен бірлесіп бас сұқтық. 

Дамир Хисматуллин, Сарыарқа аудандық ішкі саясат бөлімінің басшысы:

- Жергілікті халықтың айтуынша, нысан маңайында кәмелетке толмаған жеткіншектер жиналып, алкоголь өнімдерін сатып алады. Бұдан бөлек ішімдікті тиісті құжатсыз сатып келген. Осы мәселеге қатысты Сарыарқа ауданының әкімдігі Мемлекеттік кірістер басқармасымен бірлесіп жедел шаралар қабылдады. 

Жыл басынан бері қалада лицензиясыз саудаланған  190 мыңнан астам шөлмек ішімдік тәркіленген. Лицензиясыз алкоголь өнімін сатқан кәсіп иелері  айыппұл арқалайды. Ал сатылымдағы тауар тәркіленеді. 

Нұрсұлтан Тастанов, Сарыарқа ауданы бойынша мемлекеттік кірістер басқармасының бас маманы:

- Біз рейдтердің жиі жасап тұрамыз. Себебі алькогольді өнімдерді заңды түрде сату қажет. Оған лицензия алу қажет және тұрғындардың қауіпсіздігін қамтамасыз ету. Қазіргі таңда көптеген құқықбұзушылықтар осы алкогольдік өнімдердің әсерінен болып жатыр. Сондықтан, осы алкогольді өнімдерді тәркілеу бойынша жұмыстар күшейтілуде.  

Рейдтік іс-шаралар аясында бүгінге дейін 500-ден астам дүкен тексерілген. Жүргізілген жұмыстар нәтижесінде 200-ге жуық құқық бұзушылық анықталып, кәсіп иелері әкімшілік жауапкершілікке тартылды. 

Бақытжан Көшімхан, Сарыарқа ауданы прокуратурасының бөлім прокуроры:

- Біз сатушыға заңда белгіленген уақыттан тыс және 21 жасқа толмаған тұлғаларға алкоголь өнімдерін ұсынғаны үшін әкімшілік жауапкершілік қарастырылғанын айтып, ескерту жасадық. Сондай-ақ ішімдіктер тиісті лицензиясыз сатылған жағдайда 25 айлық есептік көрсеткіш мөлшерінде айыппұл көзделгенін айттық. 

Алкоголь өнімдерін бақылау әлеуметтік маңызы бар мәселе. Сондықтан "Заң мен тәртіп" қағидаты негізінде бұл бағыттағы жұмыстар тұрақты түрде жүргізіледі, - дейді мамандар. 

Дильназ Тұрғазыева, Мадияр Қындыбаев