Елордада түнде жүрген жасөспірімдерді анықтауға арналған рейд өтті

– Бізде мұндай жедел іс-шаралар жиі ұйымдастырылып отырады. Құқықтық тәртіпті сақтау жедел іс-шарасы аясында сегіз кинорумды араладық, – деді Астана қаласы Сарыарқа ауданы полиция басқармасының қоғамдық қауіпсіздікті қадағалау және кәмелетке толмағандар істері жөніндегі инспекторы, полиция лейтенанты Шұғыла Аманқызы.

Оның сөзінше, кәмелетке толмағандарға түнгі сағат 22:00-ден кейін көңіл көтеруге арналған ойын-сауық нысандарында жүруге болмайды. Олардың қатарына сауда орталықтары, компьютер клубтары, кинорумдер т.б. жатады. Ал 23:00-ден таңғы сағат 06:00-ге дейін заңды өкілінсіз, тіпті, көшеде жүруге де рұқсат етілмейді.

Егер жасөспірімдер заңнаманы бұзса, ата-аналарына не заңды өкілдеріне әкімшілік жауапкершілік қарастырылған.

– Бірінші рет ұсталған жағдайда ҚР Әкімшілік құқықбұзушылық туралы кодексінің 442-бабының, 2-бөлігі бойынша ескерту беріледі. Екінші рет ұсталса, ата-анасына не заңды өкіліне 15 137 теңге көлемінде әкімшілік айыппұл салынады. Сонда да болған жағдайдан сабақ алмай, түнде қала кезуін жалғастыра берсе, қараусыз, қадағалаусыз жүрген жасөспірім ретінде есепке алынады. Ұсталған жасөспірімдерді заңды өкілі келіп алып кете алмаса, арнайы бейімдеу орталығына орналастырылады, – деді Шұғыла Аманқызы.

Полиция лейтенантының айтуынша, бірінші рет ұсталғаннан кейін жасөспірімдерге ескерту беріліп, профилактикалық түсіндіру жұмыстары жүргізіледі. Кейін соның арқасында, әдетте, олардың көбі түзеліп, қателігін қайталамайды.

Ал Сарыарқа ауданы әкімдігі Ішкі саясат бөлімінің басшысы Дамир Хисматуллинның сөзінше, бұл бағыттағы жұмыстар үздіксіз жалғасып келеді.

– Сарыарқа ауданы әкімдігінің Жастар саясаты басқармасы аудандық полиция басқармасының қызметкерлерімен бірлесіп, профилактикалық рейд жүргізді. Оның мақсаты – заңды өкілінсіз ойын-сауық орындарында және көшеде жүрген кәмелетке толмаған азаматтарды анықтау. Жалпы, мұндай жұмыс күн сайын жүргізіледі. Сарыарқа ауданында жыл басынан бері 300-ден астам әкімшілік хаттама толтырылды. Түнде жүрген жасөспірімдердің заңды өкілдері әкімшілік жауапкершілікке тартылды, – деді ол.

Сонымен қатар, маманның мәлімдеуінше, мұндай арнайы рейдтер апта сайын өтеді. Негізінен, караоке-барлар, түнгі клубтар, кинорумдер, компьютер клубтары т.б. орындар тексеріледі.

Жасөспірімдердің ата-аналары мен заңды өкілдері ғана емес, оларды түнгі уақытта ойын-сауық орталығына кіргізгендер де жауапқа тартылады.

– Кәмелетке толмағандарды 22:00-ден кейін қабылдаған бизнес субъектілерінің иелері мен жауапты қызметкерлеріне де әкімшілік жауапкершілік қарастырылған. Оларға ҚР Әкімшілік құқықбұзушылық туралы кодексінің 132-бабы бойынша айыппұл салынады. Биыл жыл басынан бері мұндай 7 факті тіркелді, – деді Дамир Хисматуллин.

Сонымен бірге, оның сөзінше, мұндай рейдтерде түрлі жағдайлар болады. Кей бозбалалар қашып кетуге тырысуы мүмкін. Ондай кезде «Полиция қызметкерінің заңды талабына бағынбау» бабы бойынша әкімшілік жауапкершілік қарастырылған.

Бұл рейдке Астана қаласы әкімдігі Жастар саясаты басқармасына қарасты «Астана жастары» жастар ресурстық орталығы да қолдау білдірді. Медиа және PR бөлімінің басшысы Анар Мырзабаева ізгі қоғам қалыптастыруға үлес қосып жатқанын айтады.

– Біздің орталық түнде жүрген жасөспірімдердің ата-анасын не заңды өкілдерін жауапқа тарта алмайды. Бірақ мұндай бастамаларға қолдау білдіреміз. Мақсатымыз – профилактикалық жұмыс жүргізу. Жас буын заңға бағынатын, тәртіпті, тәрбиелі азамат болып қалыптассын деген ниетпен осындай іс-шараларға қатысамыз, – дейді ол.

Анар Мырзабаеваның айтуынша, жастар ресурстық орталығының «Заң мен тәртіп» қағидатын іске асыруға және құқықтық мәдениетті қалыптастыруға арналған бұдан да басқа көптеген бастамасы бар.

– Мысалы, «Есірткісіз елорда», «Стоп, вандал» тәрізді жобаларды атауға болады. Былтыр біз аталған жұмыстар аясында ішкі істер органдарының қызметкерлерімен бірлесіп, 10 тонна насыбай тәркіледік, – деді ол.

«Астана жастары» жастар ресурстық орталығының 25 қызметкерінен бөлек, жобаларына атсалысатын 8 мың ерікті бар. Солардың 10-ы аталған рейдке қатысып, толықтай басы-қасында жүрді.

– Құқықтық мәдениетті дамыту, құқық бұзушылықтың алдын алу, жасөпірімдерге оң, түзу жолды көрсету мақсатында жыл сайын екі мыңға жуық іс-шара өткіземіз, – дейді Анар Мырзабаева.

Айта кетейік, бұған дейін кәмелетке толмағандар істері жөніндегі комиссиялардың қызметі жаңартылғанын жазғанбыз.

Сонымен қатар, Аида Балаева кәмелетке толмағандар істері жөніндегі өңірлік комиссиялардың құрамын жаңартуды тапсырды.