Енді медицина мамандары арнайы сыйақы алады

Енді медицина мамандары созылмалы ауру белгілерін ерте анықтағаны үшін 1 млн 700 мың теңгеге дейін сыйақы ала алады.

Денсаулық сақтау министрлігі енгізген жаңа жүйеге сәйкес, ақ халаттыларға төленетін қосымша үстемақы сырқат түріне қарай 4,5 - 5 айлық есептік көрсеткіш көлемінде балдық жүйемен есептеледі. Бұл ретте жүрек, қан айналым жүйесі, қант диабеті, обыр, туберкулез сынды созылмалы, күрделі ауру түрлеріне басымдық беріледі. 

Соңғы 4 жылда елімізде созылмалы сырқатқа шалдыққан азаматтардың қатары әдеуір артқан. Демікпе, қант диабеті, өкпе, бүйрек аурулары, обыр, жүрек қан тамырлары жүйесі ауруларымен арпалысып жүрген жандардың қатары жыл сайын жасарып, ұлғайып отыр. Дендеген дерттің бетін қайтару үшін ауру белгісін ерте бастан анықтаған абзал. Бұл мақсатта министрлік ақ халаттыларға ынталандыру ретінде мемлекеттік қолдау тетігін енгізді.

Жанар Серікқызы, С.Қайырбеков атындағы ұлттық ғылыми денсаулық сақтау орталығының бас директоры:

- Медициналық қызметті алу емханада 600 есе көбейіп кетті. Соған байланысты осы жүйені қайтадан қарастырдық. Енді емханадағы дәрігерлер ай сайын емес, тоқсан сайын өздерінің нақты нәтижелері үшін балды жинау арқылы 1,7 млн-ға дейін және бонустарға байланысты 2 млн-ға дейін жете алады.

Жіктеп айтар болсақ, қант диабеті мен қан айналым жүйесі сырқатына шалдыққан науқастарды динамикалық бақылауға алып, қан талдауын және өзге де медициналық тексерістердің барлығын жүргізген маман 50 балл алады. Учаскелік дәрігер өзінің аймағындағы созылмалы ауруды ерте анықтап, жүктілікке дейінгі барлық қыз-келіншектерді сауықтырса, 25 балл жинайды. Өзіне тіркелген аймақта бала өлімі болмаса, бұған да қосымша балл беріледі. Осылайша, мамандар 100 балға дейін үстемақы ала алады. Әр балл 4 жарым АЕК-ті құрайды.

Жанар Серікқызы, С.Қайырбеков атындағы ұлттық ғылыми денсаулық сақтау орталығының бас директоры:

- Егер аймақта ерте қатерлі ісікті анықтаса және туберкулез ауруын анықтайтын болса, одан бонус алады. Ол 5АЕК құрайды. Бұл бір ғана жалпы практика дәрігері емес. Ол команда бойынша алады. Яғни жалпы практика дәрігері. Оның қасында мейірбикесі бар, фельдшер алады. Одан бөлек, әр аймақта бекітілген акушеркасы болады. Сол кісілер де алады.

Демек үстемақы әрбір медициналық аймаққа, ұжымдық еңбек нәтижесінде жылына 4 рет беріледі. Бұған дейін мұндай сыйақы арнайы комиссияның шешімімен тек таңдаулыларға ғана аз көлемде берілетін. Енді әрбір медицина маманы өз ұжымының қандай деңгейде қызмет атқарғанын, қанша көлемде сыйақы алатынын ашық ақпарат көзі арқылы біліп отырады.

Бекжан Нәмет, №10 қалалық емхананың учаскелік дәрігері:

- Жұмыс істегеніме 6 жыл болды. Бұған дейін жұмыс істегенде СКПН айына 1 ақ рет төленетін. Қаржы аз, 30-40 мың теңге. 2025 жылдан бастап қосымша 500-600 мыңға дейін ақша таба аламыз. Мен ең біріншісінде 1 кварталға 371 мың теңге алдым. Жүйені түсінгеннен кейін квартал сайын қаржыны көбейте береміз. Яғни 1млн 700-ді учаскелік дәрігерлер 35 пайызын бізге беріледі.

Дәрігердің айтуынша, ол үшін мамандарға қосымша жүк артылып, жұмыс кестесіне еш өзгеріс енбейтін көрінеді.

Бекжан Нәмет, №10 қалалық емхананың учаскелік дәрігері:

- Қосымша жүктеме болып жатқан жоқ. Бұл өзіміздің күнделікті жасап жатқан жұмысымыз. Яғни диспансерлік бақылаудағы науқастарды қадағалау. Олардың асқынуының алдын алу сияқты осы жұмыстар ғана. Өзімнің учаскемде 1700 адам тіркелген болса, ол жерде бізде қант диабеті екінші типімен 41 науқас бар. Артериялық қан қысымымен тұратын учетте 100 адам учетте тұрады.

Надежда Павленко, қала тұрғыны:

- 3 деңгейлі гипертония, демікпе және қант диабеті аурулары бойынша диспансерлік тіркеуде тұрмын. Дәрігерлерге рахмет, үнемі қан талдамасын тапсыруға, тексерілуге шақырып тұрады. Жалпы оларға қосымша төлемақы берілгені дұрыс деп ойлаймын.

Медицина мамандарына берілетін сыйақы толықтай әлеуметтік медициналық сақтандыру қоры есебінен төленеді. Биылға қор тарапынан бұған 24 млрд теңгеден астам қаржы бөлініпті.

Светлана Пономарева, Әлеуметтік медициналық сақтандыру қоры басқарма төрағасының орынбасары:

- Бірінші және екінші тоқсан қорытындысы бойынша, 10 млрд теңге көлемінде 50 мыңнан астам медицина маманына үстемақы аударылды. Еліміздің барлық аймағы қамтылды. Десе де 90 пайыздан артық көрсеткішке қол жеткізіп, үздік нәтиже көрсеткен өңірлер қатарына Абай, Түркістан, Жамбыл облыстары мен Шымкент қаласының мамандары ілікті.

Ал Жетісу, Қостанай және Алматы облыстары керісінше көш соңынан көрінді. Келер аптада үшінші тоқсанның қорытындысы жасалып, үшінші мәрте қосымша төлемақы жүргізілмек. Айта кеткен жөн, сыйақыны мамандар әр үш ай сайын бірнеше мәрте алу мүмкіндігіне ие. Тек қызметінде оң нәтиже көрсетіп, науқастарын емдеп жазса болғаны.

Авторлары: Назым Кенжебай, Мерей Талап, Ғалымжан Абдылахат