Медицина мамандары тәуелсіз бағалау арқылы сынақтан өтеді

Ендігәрі санитариялық-эпидемиологиялық қызмет, фармация және денсаулық сақтау менеджменті саласының мамандары да сынақтан өтеді. 

Яғни олар біліктілігін дәлелдейтін тәуелсіз емтихан тапсырады. Бұрындары тек дәрігерлер ғана кәсіби дағдыларын растап, сертификат алатын. Ұлттық тәуелсіз емтихан орталығының мамандары емделушлердің қауіпсіздігін осылай күшейтеміз деп отыр. 

Емделуші қауіпсіздігі басты назарда. Осыны негізге алған Ұлттық тәуелсіз емтихан орталығы 2017 жылдан бері дәрігерлердің кәсіби дағдылары мен білімін бағалап келеді. Мұнда емделушімен тікелей жұмыс істейтін ақ халаттылардың  теориялық және тәжірибелік біліктілігі сыналады.  Бұдан былай санитариялық-эпидемиологиялық қызмет, фармация және денсаулық сақтау менеджменті саласының мамандары да сынақтан өтеді.

Олжас Асан, Ұлттық тәуелсіз емтихан орталығы тұтынушыларды ақпараттық қолдау және қызмет көрсету басқармасының басшысы:

- Біздің бағалау әдіснама дәлелді тәсілдерге негізделген. Және кәсіби стандарттар, білім беру стандарттары және денсаулық сақтау тәжірибесінің қажеттіліктерімен үйлестірілген. 0103 Біздің миссиямыз — мамандардың кәсіби даярлығын тәуелсіз, объективті және дәлелді бағалау арқылы қоғамның денсаулық сақтау қызметкерлеріне деген сенімін нығайту.

Ал жақында Ұлттық тәуелсіз емтихан орталығы бағалау жүйесіне халықаралық тәжірибелерді енгізді. Бұған ұқсас емтихан дүние жүзінің 70 елінде бар. Демек отандық дәрігерлер халықаралық дәрежедегі емтиханнан сүрінбей өтуі қажет. Себебі біздегі тәуелсіз емтихан жұмыстарын АҚШ-тың Ұлттық медициналық сынақ кеңесі жоғары бағалаған. Әрі мұндағы мамандар жақында Чикагода тәжірибеден өтті. Тіпті мұндай емтихан орталығы Орталық Азия елдері арасында біздің елде ғана бар.

Жанна  Мәженова, Ұлттық тәуелсіз емтихан орталығы емтихан материалдарын әзірлеу бөлімінің бас маманы:

- Біздің жетістіктеріміз Орталық Азия елдерінің халықаралық форумдарында ұсынылды. Мәселен, Ташкентте Қазақстан медицинасы күндеріне орай біздің тәжірибеміз ТМД елдері аумағында бірегей деп танылды. Медициналық қызметкерлерге арналған лицензиялық емтихандар саласындағы әлемдік көшбасшылармен – АҚШ-тың Ұлттық медициналық емтихан кеңесімен, АҚШ-тың Мемлекеттік мейірбике кеңестері ұлттық кеңесімен ынтымақтастықтың арқасында біз әдістемелік базамызды нығайттық және құзыреттерді бағалауды емтихан маманның дербес практикаға дайын екендігінің дәлелі болатын деңгейге шығардық.

Сондай-ақ болашақ дәрігерлер дипломын қолға алмас бұрын Медицина негіздері бойынша халықаралық емтихан тапсырады. Тәуелсіз бағалау арқылы саладағы олқылықтарды ерте анықтауға мүмкіндік бар, дейді мамандар. 

Айнұр Қуатқызы, Самат Қазанбаев