Енді өтінімнің орындалу барысын ЦОН қосымшасы арқылы көруге болады

АСТАНА, 7 қараша – Sputnik. "Азаматтарға арналған үкімет" мемлекеттік корпорациясы "ЦОН" мобильді қосымшасына жаңа функция қосты, деп хабарлайды Sputnik Қазақстан.

Енді азаматтар мемлекеттік қызметке берген өтінімнің мәртебесін нақты уақыт режимінде көре алады.

"Өтінім мәртебесін көру үшін қолданушы қосымшадағы "ХҚКО қызметтері" немесе "Арнайы ХҚКО қызметтері" бөлімін таңдап, өтінім нөмірін енгізуі керек", - деп жазылған хабарламада.

Бұл жаңашылдық қызмет көрсету процесін барынша ашық етіп, азаматтарға өтінімнің қай сатыда тұрғанын және нәтижені қашан алуға болатынын нақты білуге мүмкіндік береді. Ең бастысы енді өтінім мәртебесін білу үшін ХҚКО-ға барудың қажеті жоқ.

Әр қолданушы өз өтінімінің қаралу кезеңін көріп, кез келген өзгеріс туралы жедел хабардар бола алады.

"Өтінім мәртебесін бақылау жүйесін енгізу – мемлекеттік қызметтерді жаңғыртудың маңызды қадамы. Бұл шешім ашықтықты арттырып, халыққа қызмет көрсетудің қолайлылығын күшейтеді", – деді "Азаматтарға арналған үкімет" мемлекеттік корпорациясының басқарма төрағасы Арман Кенжеғалиев.

Қосымшада сонымен бірге электронды қолхаттарды сақтау және көру мүмкіндігі іске қосылған. Бұл қолхат – өтінімнің қабылданғанын немесе қызметтің көрсетілгенін растайтын ресми құжат. Ол автоматты түрде "Тапсырыс тарихы" бөлімінде сақталады.