ЕО прокуратурасы алаяқтық бойынша күдікке ілінген 11 депутатты жауапқа тартуды сұрады

Белгілі болғандай ауыл шаруашылығы субсидияларын заңсыз пайдалану бойынша ұйымдасқан схемаға мемлекеттік қызметкерлер де қатысқан. Атап айтқанда, төлемдерді бөлу мен қоғамдық көмекті бақылауға жауапты ұйым қызметкерлері күдікке ілінген. Сонымен қатар, тергеу Грекия парламентінің бұрынғы бес депутатына қатысты да жүргізіліп жатыр.

Иммунитеттен айырылуы мүмкін депутаттардың есімдері әзірге жарияланған жоқ. Алайда олардың көпшілігі премьер-министр Кириакос Мицотакис басқаратын «Жаңа демократия» партиясының өкілдері екені белгілі. Прокуратура депутаттарды тергеу барысында түсініктеме беруі үшін олардың иммунитетін алып тастауды сұраған.

Өтініш 2021 жылы жасалды деп болжанған әрекеттерге қатысты. Тергеу ЕО-ның қаржылық мүдделеріне қарсы бағытталған ауыр және жеңіл қылмыстарды қамтиды. Олардың ішінде сенімді теріс пайдалану, электронды алаяқтық және үшінші тұлғаларға заңсыз пайда әкелу мақсатында жалған мәлімет беру бар.

Сонымен қатар, бұрынғы ауыл шаруашылығы және азық-түлік министрі мен оның орынбасарының да қызмет барысында алаяқтық схемаға қатысы болуы мүмкін екені айтылды.

Грекия үкіметінің ресми өкілі Павлос Маринакис: «Әрбір жағдайды жеке қарастыру үшін іс материалдарының парламентке берілуін күтіп отырмыз», – деді.

2025 жылдың көктемінде ЕО прокуратурасы ауыл шаруашылығы қорларымен алаяқтық жасады деген күдікпен 100 грек фермеріне айып таққан болатын. Келтірілген шығын шамамен 2,9 миллион еуроға бағаланған. Politico басылымының мәліметінше, 2017 жылдан бері кейбір Грекия азаматтары өздеріне тиесілі емес жерлерге немесе мүлде жүргізілмеген ауыл шаруашылығы жұмыстарына субсидия алған.

Грекияның өзінде де жүздеген адамның ЕО субсидияларын заңсыз алғаны туралы жанжалға байланысты тергеу жүргізілді. 2025 жылдың қазан айында ұйымдасқан қылмысқа қарсы күрес басқармасы арнайы операция өткізіп, 37 адамды ұстады.

Euronews мәліметінше, бұл алаяқтықтың әшкереленуі Грекияда үлкен резонанс тудырып, фермерлердің жаппай наразылығына себеп болды. Өйткені бұл жағдай ауыл шаруашылығы субсидияларының кешіктірілуіне әкелген.

Айта кетейік, Еуропалық Одақ Израильдегі өлім жазасы туралы заңға алаңдаушылық білдірді.