Гибрид көліктерге салынған қосымша салық: Депутат шенеуніктерді жауапқа тартуды сұрады

Фото: ҚСЗИ, телеграм (архив)

Оқиғаның мән-жайы былай өрбіген: ел тұрғындары гибридті көліктерді елге әкелмес бұрын Мемлекеттік кірістер департаментіне (МКД) жүгінген. Кеден органдары ресми сараптама жүргізіп, қозғалтқыш қуатын өлшеп, «кедендік баж мөлшерлемесі – 0 пайыз» деген ресми құжат берген. Азаматтар мемлекетке сеніп, декларация толтырып, көліктерін заңды түрде тіркеген.

Алайда, біраз уақыттан соң салық және кеден органдары өз шешімдерінен айнып, «Біз қателесіппіз, енді өткен кезең үшін миллиондаған теңге төлеңіздер» деген талап қойған.

Мемлекеттік органдар бұл берешекті есептеу үшін жаңа тәуелсіз сараптама емес, нарықтағы тікелей бәсекелес саналатын «New Energy Vehicles Kazakhstan» ЖШС-нің (ресми дилер) жай ғана хатын негізге алған. 

«Шенеуніктердің бұл әрекетінен 400-ден астам отбасы, яғни 5000-нан астам азамат зардап шегіп отыр. Мемлекеттік кірістер органдары заңды белшесінен басып, заңсыздықтарға барған. Азаматтардың банктік шоттары ешқандай алдын ала хабарламасыз жабылған. Адамдар тексеру жүріп жатқанын тек карталары істемей қалғанда ғана білген. Тұрғындарға өз қарсылықтарын білдіруге немесе шешімге заңды түрде шағымдануға мүмкіндік берілмеген. Бұл жағдай кәсіпкерлікті тоқырауға ұшыратып, халық арасында елеулі әлеуметтік наразылық тудырып отыр», деді депутат.

Бюджетке 5 млрд теңге қосымша кіріс: Депутат Қазақстанға кіретін қытайлық көліктерге төлем енгізуді ұсынды

Депутат Президент алға қойған «Заң және Тәртіп» қағидатын қорғау үшін Премьер-министрден шұғыл шара қолдануды сұрады.

«Мемлекеттік кірістер комитеті мен өңірлік департамент басшыларының өкілеттіктерін асыра пайдалану фактілері бойынша тексеру тағайындау керек. Заңсыз хабарламалардың күшін жойып, мәселе толық шешілгенше азаматтардың есепшоттарын дереу ашу қажет. Салық органдарының «New Energy Vehicles Kazakhstan» ЖШС-не жасанды артықшылықтар берген-бермегенін анықтау керек. Осы құқықтық озбырлыққа жол берген шенеуніктерді қатаң жауапқа тарту қажет», деп аяқтады депутаттық сауалын Абзал Құспан.

«Бұл – күшті мемлекеттің көрінісі»: Депутаттар жаңа рақымшылық туралы айтты