ERG Skills International байқауы жастар мен мамандарды біріктірді

Ақсу қаласында тау-кен металлургия кешеніндегі 160-тан астам маманды, студенттер мен тәлімгерлерді біріктірген ERG Skills International халықаралық кәсіби шеберлік байқауы өтті. Байқау Жұмысшы мамандықтар жылы аясында WorldSkills стандарттары бойынша ұйымдастырылды, деп хабарлайды Egemen.kz.

ERG Skills International халықаралық кәсіби шеберлік сайысы елдегі кадрлық әлеуетті дамыту мен жұмысшы мамандықтарын насихаттаудың маңызды кезеңіне айналды.

Шеберлік, технология, болашақ. Сайысқа қатысқан 160 үміткер мен олардың тәлімгерлері өз мамандықтарына адалдықтың үлгісін көрсетуде осы идеялық бағыттарды ұстанатындарын байқатты. Eurasian Resources Group компаниясы ұйымдастырған байқауда отандық тау-кен және металлургия кешенінің үздік мамандары мен студенттері және Қытайдан келген білікті қызметкерлер өнер көрсетті. Атап айтқанда, «Qarmet» АҚ, «Алтыналмас АК» АҚ, «Қазақмыс» Тобы, ERG кәсіпорындарының белді мамандары бар. Ақсудағы өндіріс алаңдары мен кәсіптік колледждер бұл күндері кәсібилік, құзірет пен өндіріске заманауи көзқарастары безбенделген тартыс алаңына айналды.

Ұйымдастырушылар атап көрсеткендей, байқау жұмысшы мамандықтар саласындағы кәсібиліктің эталоны саналатын – WorldSkills стандарттары бойынша өткізілді. Құю ісі, дәнекерлеу технологиялары, темір жону мен слесарьлық, өнеркәсіп автоматикасы, электромонтаж, CAD инженерлік графикасы, зертханалық-химиялық талдау, еңбекті қорғау мен тау-кен ісі, маркшейдерлік, пайдалы қазбаны байыту, сандық басқару қондырғысы бар станок операторы сынды 13 негізгі құзірет бойынша өткен жарыстар 5 күнге жалғасты. Білім беру бағытына ерекше назар аударылды. ERG мен колледждер альянсы, сондай-ақ басқа да оқу орындарының өкілдері, ұзын саны 15 колледж бен университет өкілдері қатысты. Бұл қатардан Рудный индустриалдық институты, Торайғыров университеті, Ақтөбе жоғары политехникалық колледжі, Ақсу қара металлургия колледжін бөле-жара айтуға болады. Байқауға қатысқан студенттер жоғарыда аталған оқу орындары Қазақстанның тау-кен металлургия кешеніне білікті мамандар дайындап отырғанын тағы бір мәрте дәлелдеді.

«Біздің компания кадрларды даярлау экожүйесін жүйелі түрде дамытып келеді. Мектеп қабырғасында кәсіби бағдар беруден бастап, колледждер мен жоғары оқу орындарындағы, сондай-ақ біздің корпоративтік университетіміздегі оқыту бағдарламаларын түгел қамтимыз. ERG Skills International сайысын өткізу – аталған экожүйенің тағы бір тиімді элементі. Бұл тек жеке мамандар үшін ғана емес, бүкіл сала үшін маңызды екеніне сенімдімін. Ол еңбек стандарттарын жоғарылатып, жас мамандардың кәсіби құзіреттерін дамытуға ықпал етеді», дейді ERG-дің Қазақстандағы бас директоры Серік Шахажанов.

Өз шеберлігін дәлелдеуге бел буған қатысушылар арасында «Қазақстан алюминийі» АҚ электр стансасының 19 жастағы қызметкері Қайсар Дәулетбай да бар. Ол «Токарлық іс» құзіретінде шеберлігін көрсеткен.

«Бүгінгі байқауда біздің командамыз сәттілікке сеніп, қолдан келген шеберліктерін паш етті. Жарыс шарттарына сәйкес, сызбалар бойынша тапсырмаларды орындап, жаңа бөлшектер шығардық. Былтыр мен WorldSkills Павлодар – 2024 өңірлік чемпионатының жеңімпазы, сондай-ақ EnergySkills жүлдегері атандым. Биылғы халықаралық бәсекеде де үздіктер қатарынан көрініп отырмын»,  дейді жігерлі жас.

ERG Service компаниясының СББ токарі Дмитрий Гусев байқау кезіндегі ережелер жоғары дәлдікті және өңдеу технологиясын терең меңгеруді талап еткенін жеткізді.

«Жаңа буындағы заманауи СББ токарлік станогында жұмыс істеу әсіресе, қызықты болды. Оны шектеулі уақыт ішінде игеру нағыз сынаққа айналды. Бірақ дәл осындай міндеттер кәсіби дамуға және өз қабілетіңді арттыруға сенімділік береді. ERG Skills International-дағы жеңіс – тек жеке күш-жігердің ғана емес, сонымен қатар әріптестерімнің және өсу үшін барлық жағдайды жасап отырған компанияның тұрақты қолдауының нәтижесі», деді Дмитрий Гусев.

Қытайдың Шаньси энергетикалық кәсіптік-техникалық колледжінен қатысқан 2-курс студенті Хоу Ию Хан Аспанасты елінен 4 бірдей үміткер өнер көрсеткенін жеткізді. Айтуынша, бұл байқауға қатыса отырып ол өзінің кәсіптік дағдыларындағы кемшіліктерін аңғарыпты.

«Мен үшін бұл байқау үлкен тәжірие алаңы болды. Барлық жағынан үйренген істерім көп. Тәжірибем әлі де аз екенін байқадым. Қытайдан келген өзге қатысушылар маған қарағанда лайықтырақ өнер көрсетті деп ойлаймын», дейді ол.

Байқау қорытындысында «Тау-кен ісі», «CAD инженерлік графикасы», «Химиялық талдау зертханашысы», «Құю өндірісі», «Маркшейдерлік іс және геодезия», «Пайдалы қазбаны байыту», «Еңбекті қорғау», «Өнеркәсіптік автоматика», «Дәнекерлеу технологиялары», «Слесарьлік іс», «Токарлік іс», «СББ токарлік ісі», «Электромонтаж» құзіреттері бойынша үздіктер анықталды.

Жалпы, ERG Skills кәсіби шеберлік байқауы 2023 жылдан бері жыл сайын тұрақты өткізіліп келе жатыр. Ал ERG Skills International кәсіби шеберлік конкурсын өткізу компанияның техникалық және кәсіптік білім беру жүйесін жаңғыртудағы, сондай-ақ отандық тау-кен-металлургия кешені үшін кадрлар даярлаудың үздік халықаралық тәжірибелерін ілгерілетудегі көшбасшылығын растады. Іс-шара өндірістік кәсіпорындар мен білім беру ұйымдары арасындағы ынтымақтастықты нығайтуда, кәсіби құзіреттілікті дамытуға және жұмысшы кәсіптерін танымал етуге ықпал ететін маңызды қадам болды.

Павлодар облысы

Ақсу қаласы