STEM Ұстаз елді біріктірді

Жаңа білім беру бастамасының миссиясы – еліміздің оқушылары мен педагогтерінің цифрлық сауаттылығы мен жасанды интеллект саласындағы құзыреттерін дамытуға, сондай-ақ мектептердің жаһандық AI қауымдастығына сәтті кірігуіне қолдау көрсету.

«STEM-Ұстаз» жобасы еліміздің түкпір-түкпіріндегі педагогтерді біріктіріп, мұғалімдердің жеке цифрлық әлеуетін арттырудың қаншалықты маңызды екенін аңғартты. Мұғалімдердің IT-сауатын кеңейтуге бағытталған бұл форсайт-жоба Абайдың туған жерінде, ұлы ойшылдың мерейтой жылында бастау алған еді. Жазғы демалыс кезінде Астанада орталық өңірлердің мұғалімдері өз біліктілігін жетілдірді. Оқудың соңғы нүктесін Атырау мен Маңғыстау облыстарының қала және аудан мектептерінің ұстаздары қойды. Сонымен қатар жобаға еліміздің барлық дерлік өңірінен педагогтер онлайн форматта қосылды.

Бағдарлама робототехника пәнін оқытудың негізгі бағыттарын қамтыды – базалық деңгейден бастап спорттық бағыттарға дейін, оның ішінде техникалық жарыстарға оқушыларды даярлау әдістемелері енгізілген. Курстың 80%-ын практикалық сабақтар құрады. «STEM-Ұстаз» жобасы бойынша оқу мен кейінгі әдістемелік сүйемелдеу тегін жүргізілді.

– Жоба аясында еліміздің барлық өңірлерінде қазіргі оқушыларды цифрлық дәуірдің сын-қатерлеріне дайындап жүрген робототехника пәні мұғалімдерін оқыттық. STEM-Ұстаз – мұғалімдердің кәсіби дамуына және AI-заманының креативті педагогіне айналуы үшін нақты мүмкіндік, – деп атап өтті Астанадағы «Robotek» білім беру робототехника мектебінің бас директоры Санжар Шалқарбеков.

Жоба қатысушыларына сертификаттарды табыстау үшін Атырауға арнайы ExxonMobil Қазақстан компаниясының басқарушы директоры Сесиль Ролин келді. 

– Елдік жоба қазіргі оқушыларды жаһандық AI үрдістеріне бейімделуге шабыттандырып, кәсіби бағытын айқындауға және әлемдік деңгейдегі болашақ инженерлік кадрларды қалыптастыруға ықпал етеді.

Жазғы демалыс кезінде өз біліктілігін цифрлық тұрғыда жетілдірген  ақтаулық Назира Телбаева «STEM-Ұстаз» жобасы отандық педагогтердің кәсіби дамуының жаңа кезеңін ашқанына сенімді: – Бұл жобаға қатысқан барлық ұстаздар мен олардың оқушылары енді өзге IT-бастамаларға, соның ішінде робототехника бойынша республикалық және халықаралық олимпиадаларға қатысу мүмкіндігіне ие болды. Цифрлық дәуірдің талаптарына балаларды бейімдеу үшін біз, ең алдымен, өзіміз заман стандарттарына сай болуымыз қажет, – дейді ол. 

Бүгінде «STEM-Ұстаз» жобасын тәмамдаған мұғалімдер өз мектептерінде жаңа білім мен тәжірибені таратуда. Отандық табысты форсайт-бастама «Robotek» шетелдік серіктестерінің қызығушылығын тудырды. Алдағы уақытта компания бұл сұранысқа ие жобаны бірнеше елде кеңейтуді жоспарлап отыр. «STEM-Ұстаз» Қазақстанның жаһандық цифрлық кеңістікке және Alem.AI экожүйесіне интеграциялануын жалғастыруда.