Ерлі зайыпты үйінің қабырғасынан 112 жыл бұрын жазылған құпия хатты тауып алды

АҚШ-та ерлі-зайыпты үйін жөндеу кезінде қабырғаның ішінен бір ғасырдан астам уақыт бұрын жазылған хат тауып алды, – деп хабарлайды Aikyn.kz сайты.

1914 жылдан бері сақталған хаттың кімге арналғаны белгілі болғанымен, оның не себепті жасырылғаны әлі күнге дейін жұмбақ күйінде қалып отыр.

Оқиға АҚШ-тың Иллинойс штатындағы Эванстон қаласында болған. Кейт Пирс пен оның күйеуі Билл ескі үйінің асүйін жөндеп жатқан кезде қабырғаның ішінен шаң басқан конвертті байқайды. Хат бұрын қызметшілер пайдаланған бөлменің жанындағы қабырғаға жасырылған. Ерлі-зайыпты конверттің ашылмағанын және онда 1914 жыл көрсетілгенін анықтаған. Ең қызығы, хат ағылшын тілінде емес, швед тілінде жазылған. Оның сыртындағы мекенжайға қарағанда, хат осы үйдің бұрынғы тұрғындарына емес, көршілерінің біріне арналған. Бұл жағдай оның неліктен басқа үйдің қабырғасында қалғанына қатысты сұрақ туғызған.

Кейін хаттың Эльза есімді адамға арналғаны және оны анасы жазғаны белгілі болған. Дегенмен хаттың өз иесіне не себепті жетпегені анықталмаған. Ерлі-зайыпты бұл олжаны үйдің тарихымен байланысты ерекше естелік ретінде қабылдаған. Кейт Пирс хатты басқа жерге алып кетпей, табылған үйінде қалдыруды жөн көрген. Осылайша, бір ғасырдан астам уақыт бойы қабырға ішінде сақталған хат сол үйдің тарихының бір бөлігіне айналған.