Ешқандай жаттығусыз және дайындықсыз ШҚО лық апай таңғаларлық күш көрсетті

Шығыс Қазақстан облысының тұрғыны Қазнет жұлдызына айналды. Ол 30 келілік қойды 40 рет көтеріп, көрермендерді таңғалдырды, - деп хабарлайды Tengri Life.

Бәрі қалай басталды?

Өскеменнен небәрі 10 шақырым жердегі Қасым Қайсенов кентінде нағыз мереке ұйымдастырылды. Онда Nomad Álemi заманауи көшпенділер фестивалі өтіп, қатысушылар күш, ептілік пен төзімділік бойынша сынға түсті.

Фестивальдің басты жұлдызы қазақстандық Жаңылсын Бибол болды.

Instagram-дағы бұл жарияланымды көру

TengriNews | Қазақстан жаңалықтары (@tengrinewskz) жарияланымы

Ол алдымен өзге қатысушыларды сырттай бақылап тұрғанын айтты. Олардың қой макетін қалай көтеріп жатқанын көрген соң, ол өзі де бағын сынап көрмекші болады.

"Оның салмағы 30 келі екенін білген жоқпын. Тек көтеріп көрейінші деп шештім. "Қолымнан келер ме екен, көрсек көрейік" деп ойладым. Алдымен бірнеше рет көтердім, кейін жұрт демеу беріп, қошеметтей бастаған соң тоқтамауды ұйғардым. Осылайша біртіндеп 40-қа жеткіздім. Кейін еш жерім ауырған жоқ. Есесіне немереме сыйлық берілді", - деді Жаңылсын Бибол.

Апаның айтуынша, көрермендердің қолдауы оған сенімділік ұялатқан. Осылайша, жай ғана талпыныс 40 мәрте қайталауға ұласты.

Суретті кейіпкер ұсынды

Жаңылсын Бибол 1967 жылы туған. Жақында ол 60 жасқа толады, алайда байқау ұйымдастырушылары қателесіп, оны 70 жаста деп көрсеткен. Ол бұл қателікке ренжімейді, керісінше, мұны жақсы ырымға балап, алда әлі ұзақ ғұмыр күтіп тұрған шығар деп әзілдейді.

"Бұл видеоның мұншалықты танымал болып кететінін күткен жоқпын. Балаларым мен туыстарым көріп, қуанып, қолдап жатыр", - дейді Жаңылсын апа.

Осыдан екі жыл бұрын Жаңылсын Бибол Қасым Қайсенов кентіне көшіп келген. Оған дейін 10 жыл бойы Сағыр ауылында тұрып, бірнеше жыл аудандық әкімдікте жұмыс істеген. Оның үш баласы мен бірнеше немересі бар. Сонымен қатар, апаның айтуынша, спорт оның өмірінде ешқашан болмаған - ол арнайы жаттығулармен айналыспаған. Өзінің күш-қуатын ол мықты денсаулығымен байланыстырады.

Тағы оқыңыз: “Әже, аулаңыз нағыз Диснейленд қой“: зейнеткер ескі заттардан жасалған ерекше ауласын көрсетті

Бізді Google-дың негізгі дереккөздер тізіміне қосыңыз