Ескі әдіс жаңаша түрде: қазақстандықты тазарту үшін миллиондаған ақша беруге көндірген

Қарағандыда 78 жастағы зейнеткер "бойыңда өлім қарғысы бар" деп сендірген алаяқтардың құрығына түсті, деп хабарлайды Tengrinews.kz тілшісі.

"Тазарту рәсімін" өткізу сылтауымен әйел алтын бұйымдары мен 15 миллион теңгеге жуық ақшалай жинағынан айырылған. Қарағандыда алаяқтар зейнеткерді "қарғыстан тазартамыз" деп алдап кеткен

Полицияның мәліметінше, оқиға қария үйіне қайтып бара жатқанда болған. Көшеде оған үш бейтаныс әйел жақындаған. Алдымен олардың бірі стоматологияға баратын жолды сұраған, алайда көп ұзамай әңгіме арнасы күтпеген бағытқа бұрылған.

Алаяқтар зейнеткердің қорқынышын пайдаланған: олардың бірі әйелге жақын адамынан қарғыс тигенін айтқан. Бейтаныс әйел егер тез арада "тазарту" жасамаса, туыстарының бірі қайтыс болуы мүмкін екен айтқан.

Қорыққан әйел бейтаныс жандардың сөзіне сеніп қалған. Алдымен оны "тазартқыш" ине сатып алуға көндіріп, кейін қарғысты "өткізу" мақсатында бірнеше символикалық әрекеттер жасаған, содан соң үйден шикі жұмыртқа әкелуді сұраған.

Зейнеткер қайтып келгенде, алаяқтар қарғысты толық жою үшін барлық алтын бұйымдар мен ақшаны "тазарту" қажеттігін айтқан. Олар құнды заттарды газетке орауды бұйырып, кейін байқатпай түйіншекті ауыстырып жіберген.

Instagram-дағы бұл жарияланымды көру

NEWS Karaganda-Ulytau (@newskor.krg) жариялаған материал

Қоштасар сәтте қаскөйлер түйіншекті 40 күн бойы ашуға болмайтынын қатаң ескерткен. Олардың айтуынша, осы мерзімнен кейін оны өртеп, күлін сол жерге алып келу керек болған.

Алайда түнде әйелдің көңілі мазасыздана бастаған. Ол нұсқауды бұзып, түйіншекті ашып қараған. Ішінде тек қағаз болып шықты. Барлық алтын бұйымдар мен жиналған ақша жоқ болып кеткен.

Тәртіп сақшылары берілген сипаттамалар арқылы күдіктілердің ізіне түскен. Олардың Павлодар, Алматы қалаларының және Жетісу облысының тұрғындары екені анықталды. Полиция олардың бұған дейін де осындай қылмыстарға қатысы болуы мүмкін деп болжап отыр.

"Бастапқыда әйелдерді тіркелген жері бойынша табу мүмкін болмады. Кейін жедел уәкілдер күдіктілердің Теміртауда болуы мүмкін екені туралы мәлімет алды. Нәтижесінде олар ұсталды, ал жәбірленуші үшеуін де таныды. Қазіргі уақытта күдіктілер уақытша ұстау изоляторына қамалды. Іс бойынша қажетті тергеу амалдары жүргізіліп жатыр", - деп хабарлады Қарағанды облыстық ПД баспасөз қызметі.

Сондай-ақ күдіктілерден алтын бұйымдардың бір бөлігі тәркіленгені белгілі болды. Олар қылмыстық іс материалдарына заттай дәлел ретінде тіркелді.

Полицейлер алаяқтардың адамдардың, әсіресе егде жастағы кісілердің қорқынышын, ырымшылдығын және сенгіштігін пайдаланып, психологиялық әсер ету әдістерін жиі қолданатынын ескертеді. Қазақстандықтарды бейтаныс адамдардың сөзі қаншалықты сенімді көрінсе де, оларға ақша, әшекей және басқа да құнды заттарды бермеуге шақырады.

Атақты адамдардың видеоларына сенбеңіз: қазақстандықтарға жаңа схема туралы ескертілді

Бұған дейін ІІМ қазақстандықтарға интернет-алаяқтықтың жаңа схемасы туралы ескерткен болатын. Ведомство мәліметінше, қаскөйлер азаматтарды "тиімді" инвестициялық жобаларға ақша салуға көндіру үшін танымал тұлғалардың бейнесін қолдана отырып, жасанды интеллект көмегімен дипфейктер жасауды жиілеткен.

Google News арқылы жаңалықтарымызды қадағалаңыз