Еуроодақ Украина мен Молдованың ұйымға қосылуы туралы келіссөздер басталатынын жариялады

АСТАНА, 14 маусым – Sputnik. Еуроодақтың барлық елі Украина мен Молдованың қосылуы туралы келіссөздерді бастауға келісті, деп хабарлады Еуропалық Комиссияның президенті Урсула фон дер Ляйен.

"Бүгін Еуропалық Одақ маңызды қадам жасады. Барлық мүше мемлекет қосылу туралы келіссөздердің алғашқы кластерін ашуға келісті", - деп жазды ол X әлеуметтік медиа платформасында.

Оның айтуынша, бұл кластер Еуропалық Одақтың негізгі қағидаттары мен құндылықтарын, соның ішінде "заң үстемдігі мен демократиялық институттарды" қамтиды. Ресми келіссөздер 15 маусымда бірінші үкіметаралық конференцияда басталады.

Еуроодақ 2022 жылдың маусымында Украина мен Молдоваға кандидат ел мәртебесін берді. Дегенмен бұл негізінен Киев пен Кишиневті Мәскеумен қақтығыста қолдаудың символикалық шешімі екенін мойындады. 2024 жылдың маусымында қос мемлекет пен Еуропалық Одақ арасындағы алғашқы үкіметаралық конференциялар Люксембургте өтті, осылайша қосылу туралы келіссөздер басталды.

Бұл қадамдар міндетті түрде блокқа кіруді білдірмейді және Брюссельді ештеңеге міндеттемейді: олар тек блокқа қосылу жолындағы ұзақ процестің басталуын белгілейді. Түркия 1999 жылдан бері, Солтүстік Македония 2005 жылдан бері, Черногория 2010 жылдан бері және Сербия 2012 жылдан бері кандидат болып келеді. Хорватия Еуроодаққа соңғы болып 2013 жылы қосылды, бұл процесс он жылға созылды.