Фотоаймақ, барыс және хор: Алматыда референдум қалай өтіп жатыр

Саяси науқанға байланысты Алматыдағы барлық учаскелерде ерекше әрі заманауи фотоаймақтар ұйымдастырылды. Қала тұрғындары азаматтық борышын орындап қана қоймай, арнайы белгіленген орында естелік суретке түсіп жатыр.

Фотоаймақтар бірыңғай визуалды стильде безендірілген. Мұнда баннерлер, навигация элементтері мен символикалық кескіндемелер орналастырылған.

Алматы барысы

Әлеуметтік желілерде танымал жасанды интеллект кейіпкері — Әділет атты барыс референдум учаскелерінің біріне барып, дауыс берді.

Кейіпкер киімін киген жігіт алдымен өз таңдауын жасап, кейін қала тұрғындарын науқанға қатысуға шақырды. Жоба авторларының айтуынша, барыс кейіпкері аудиториямен, әсіресе әлеуметтік желілерді белсенді пайдаланатын жастармен түсінікті әрі достық форматта байланыс орнату үшін жасалған. Оның дауыс беруі көрсетілген ролик референдумға арналған ақпараттық бейнероликтер сериясының соңғы бөлімі болды.

«Әжелер хоры» ән айтып, шашу шашылды

Наурызбай ауданына қарасты «Шұғыла» шағын ауданындағы № 562 сайлау учаскесінде тұрғындарды ұлттық нақыштағы киім киген «Әжелер хоры» қарсы алды. Әнші әжелер алғашқы минуттан-ақ адамдарға мерекелік көңіл-күй сыйлап, халық әндерін орындады. Сонымен қатар учаскеге келген азаматтардың алдында шашу шашып, ақ тілектерін білдірді.

Қуыршақтар қарсы алды

Медеу ауданында орналасқан № 361 сайлау учаскесінде балалар үшін шағын қуыршақ театрының қойылымы ұйымдастырылды.

Балалардың сүйікті кейіпкерлері бейнесіндегі ұзын бойлы қуыршақтар қонақтарды жылы жүзбен қарсы алып, олармен естелікке суретке түсті. Ересектер дауыс беруге қатысып жатқан кезде балалар түрлі-түсті қуыршақтар мен ертегі кейіпкерлері қатысқан қызықты көріністі тамашалай алды.

Ұйымдастырушылардың айтуынша, мұндай шаралар сайлау учаскесінде мерекелік атмосфера қалыптастырып, баламен келген ата-аналар үшін дауыс беру процессін әлдеқайда қолайлы етеді.

Еске салайық, бұған дейін Назым Қызайбай референдумда азаматтық ұстанымын білдірді. Ол Алматыдағы № 168 референдум учаскесіне келіп, өз таңдауын жасады.