Генеративті ЖИ курстарына сұраныс жоғары болып тұр

Былтыр білім алушылардың генеративті жасанды интеллект саласындағы курстарға деген қызығушылығы айтарлықтай өскен.

Мәселен, "Баршаға арналған генеративті ЖИ" курстар блогы бойынша алынған сертификаттар саны 2024 жылы 5,5 мың болса, былтыр 41 мыңға дейін жетті.

Ең көп сұранысқа ие курстардың қатарында "ChatGPT арқылы жаңашыл оқыту" курсы бар. Ол бойынша 11 мыңға жуық сертификат берілді. Аталған көрсеткіштер білім алушылар тарапынан генеративті ЖИ-модельдермен тиімді өзара әрекеттесу дағдыларын қалыптастыруға деген жоғары тәжірибелік сұранысты көрсетеді.

Гүлжан Жарасова, ҚР Ғылым және жоғары білім министрлігі комитетінің төрағасы:

- Профессорлы-оқытушылық құрамға келетін болсақ, персоналды оқытуға жекелендірілген. Бұл жерде OpenAI жобасы шеңберінде профессор-оқытушылар құрамы өздерінің білім бағдарламаларын әрбір студенттің жеке ерекшелігін ескере отырып, оқу материалдарын дайындауды және ол оқу материалдарын жүзеге асыруға қажетті құралдарды әзірлеуге көмекші болатын шаралар жүзеге асырылады деп күтіліп отыр.

Елде шетелдік студенттердің саны артады. Қазір өзге мемлекеттерден келген 35 мыңнан астам азамат Қазақстандағы университеттерде білім алып жүр. 2029 жылға қарай олардың санын 100 мыңға дейін ұлғайту көзделіп отыр. Ол үшін Ғылым және жоғары білім министрлігі "Study in Kazakhstan" жобасы арқылы Вьетнам, Үндістан, Индонезия және Біріккен Араб Әмірліктері секілді бірқатар елде ақпараттық науқан жүргізіп жатыр.

Гүлзат Көбенова, ҚР Ғылым және жоғары білім вице-министрі:

- Биылғы жылдан бастап "Study in Kazakhstan" цифрлық платформасын іске қосу жоспарланып отыр. Платформада Қазақстанның жоғарғы білім беру жүйесі, оқу құны, виза, ЖОО түсу туралы талаптары толық ақпарат қолжетімді болады. Сондай-ақ бағдарламаларды, университеттерді, курстар мен бағыттарды іздеу және іріктеу функциялары қолжетімді болады.

Президент тапсырмасы бойынша елде жетекші шетелдік жоғарғы оқу орындарының 33 филиалы табысты жұмыс істеп тұр. Өткен жылы Cardiff, Coventry, Woosong және Anhalt сияқты 9 жаңа кампус ашылды. Бұл дарынды жастарды елде сақтап қана қоймай, оларға шетелге шықпай-ақ жаһандық стандарттарға қол жеткізуге мүмкіндік береді. 

Мирлан Алтынбек, Ернар Нысанбай