Туристердің Маңғыстауға қызығушылығы жоғары болып тұр

Мұнайлы өңір Маңғыстауға туристердің қызығушылығы жоғары.

Каспийді көруге, әсіресе Бозжыра шатқалын көру үшін шетелден арнайы келетіндер көп. Оларға қолайлы жағдай жасау мақсатында тау бөктерінде бірнеше визит орталық ашу жоспарланған. Бұл нысандар туристердің жайлы әрі қауіпсіз демалуына жағдай жасап, аймақтың көрікті жерлері туралы бағыт-бағдар береді. 

Талғат Исламұлы, тілші: 

- Туристерді Каспий теңізінің мөлдір суы мен құмды жағалауы, Айрақты тауы, Торыш алқабы секілді көрікті әрі табиғи орындар қызықтырады. Былтыр Маңғыстауды 350 мың адам демалыс орыны ретінде таңдаған. Олардың 20%-і шетелдіктер. 

Туристер көп жағдайда Бозжыраның сұлу көрінісін тамашалағысы келеді. Кай және Зи Чжэн есімді Қытай азаматтары өңірдің өзге де көрікті жерлерін көруді армандайды. 

Зи Чжэн, турист:

- Маңғыстауға бірнеше турист болып келді. Бұған дейін Алматыны аралап, Шымбұлақта шаңғы теуіп көрдік. Ендігі мақсатымыз Бозжыраның тылсым сырлы табиғатын өз көзімізбен тамашалау.

Кай Чжэн, турист:

- Бұл жақта қар аз, желі салқын екен. Соған қарамастан алыс жолға шықпақшымыз. Бозжыраны ғаламтордан көріп, әсем келбетіне тамсандық. Содан кейін «Қызыл күп», «Тұзбайыр» сияқты киелі орындарға барғымыз келеді.

Биыл аймаққа 400 мыңнан астам турист келеді деп болжанып отыр.  Әсіресе жаз айлары Түпқараған ауданындағы суы мөлдір, құмы таза жағалауда, Ақтаудың жылы жағажайында демалушылар көп болады. Жалпы, өңірде туризм саласын жандандыруға бағытталған кешенді жоспар бар. Президент тапсырмасымен қолға алынған жобалардан инвесторлар қалыс қалмай, қомақты қаржы бөлді. Туристік нысандар Кендірлі курорт аймағы мен Бозжыра шатқалында  салынып жатыр.  

Абылайхан Жайылханов, облыстық туризм басқармасының бөлім басшысы:

- Маңғыстау өңірі қазіргі таңда туристердің ағыны бойынша жақсы көрсеткіштерді көрсетуде. 2025 жылы 9 айдың қорытындысы бойынша өңірімізне 350 мыңнан астам турист келді. Ол республика бойынша топ 8-дікке кіріп тұрмыз. Яғни үшінші орындамыз. Мысалға айтатын болсақ, Бозжыра шатқалында жалпы құны 18 млрд теңгені құрайтын 4 жоба көзделген. Сонымен қатар 13,2 шақырымдық автомобиль жолының құрылысы басталды.

2026 жылы Кендірлі әуежайының құрылысын аяқтап, халықаралық бағыттағы рейс санын көбейту күн тәртібінде тұр. Демалыс орнын жаңғырту жұмыстары өңірге турист ағынын арттыруға сеп болары анық. Жоспарға сәйкес Маңғыстауда 2029 жылға дейін жалпы құны 198 млрд теңге болатын 17 туристік жоба жүзеге асады.  

Талғат Исламұлы, Саламат Бекбаев