Таразға инвесторлардың қызығушылығы жоғары

Президент жұмыс сапарымен Жамбыл облысына барды.

Мұнда мемлекет басшысы өңірдегі іргелі кәсіпорындарды аралап, қолға алынған жобалармен танысты. Айта кету керек, тоғыз жолдың торабында тұрған Таразға инвесторлар тарапынан да қызығушылық жоғары. Жыл басынан бері өңірге 600 миллиард теңгеге жуық инвестиция тартылған. Бұл көрсеткіш бойынша Жамбыл аймағы республикада үшінші орында келеді.

Президент мінген номер бірінші борт Әулиеата жеріне түске таман келіп қонды. Траптан түсе сала Мемлекет басшысы өңірдің өндірістік аймақтарымен танысуға аттанды. Негізі Тараз оңтүстік өңірдегі химия және өнеркәсіпке негізделген экономиканың тірек нүктелерінің бірі саналады. Фармацевтика және медициналық бұйымдар өндірісін дамытуға қолайлы өңір. Осындай кәсіпорындардың біріне бүгін Қасым-Жомарт Тоқаев та ат басын бұрды. 1993 жылдан бері жұмыс істеп келе жатқан «Әмір және Д» серіктестігі онкологиялық, кардиологиялық және инфекциялық аруларды анықтайтын экспресс-тесттер мен түрлі медициналық бұйымдар шығарады. Компания жылына 20 млн бұйым өндіруге қауқарлы.

Алтыншаш Ысқақова, серіктестіктің қойма меңгерушісі

- Кәсіпорында 100-ден астам адам жұмыс істейді. Кардиомаркер, гепатит Б, гепатит С, онкоауруларға, инфекциялық ауруларға, COVID-19 тесттерін шығарамыз.

Тағы бір компания - «Super-Pharm» серіктестігі. Кәсіпорын негізінен бір рет қана қолданылатын бұйымдар шығарады. Яғни маска, шприц, лейкопластырь сынды өнімдер өндіреді. Айта кету керек, серіктестік фармацевтика нарығында ипорттық тауарларды алмастыруда маңызды рөл атқарады. 

Әділхан Әмірханов, серіктестік директоры:

- Осы жылы біз 350 млн бұйым шығардық. Оның барлығы Қазақстанға және кішігірім Қырғызстанға жіберілді. Келесі жылдан бастап біз Ресей нарығына кіруді жоспарлап отырмыз. Бүгінгі таңда біз кейбір позициялармен 70-80 пайызға дейін қамтимыз.

Орташа есеппен санағанда 40 пайызға дейін жетеді.

Жамбыл жерінде өндіріс пен кәсіпкерлік қарқын алып, өңір экономикасы тың серпінге ие болды. Ірі индустриялық жобалар мен инвестициялар мыңдаған адамды жұмыспен қамтып, облыстың әлеуетін арттырып келеді. Өңірдің қарқынды дамуына тың серпін берген жобалардың бірі - «Тараз» шағын өнеркәсіптік аймағы.

Риат Шони, тілші:

- «Тараз» шағын өнеркәсіптік аймағы 30 мың шаршы метр аумақты алып жатыр. Биыл шілде айында ғана іске қосылған ауқымды жоба құны 4,2 млрд теңге. Мұнда негізінен әктас, битум эмульсиясы, асфальт бетон өнімдері өндіріледі. 

Индустриялық аймақтың жұмысымен танысу үшін бұл жерге бүгін Президент те арнайы келді. Қасым-Жомарт Тоқаевқа бұл жақта жүзеге асырылып жатқан жобалар жайлы мәлімет беріліп, алдағы даму жоспары айтылды. 

Әбілхайыр Тамабек, Жамбыл облысы әкімінің орынбасары:

- Құрылысы басталған қазір 24 жоба бар. Олардың жалпы құны 265 млрд теңгені құрайды. Өнеркәсіптік көрсеткіш бойынша біз тарихи көрсеткішке қол жеткіздік. Яғни алғашқы рет тарихта 1 трлн теңгеден астам өнеркәсіп өнімін өндірдік. 2030 жылға дейін осы жобалардың барлығы жүзеге асқан жағдайда кем дегенде 3 есе өсіріп, 3 трлн теңгеден асырамыз.

Тоғыз жолдың торабында тұрған Таразға инвесторлар тарапынан да қызығушылық жоғары. Айта кету керек, жыл басынан бері өңірге 599,2 миллиард теңге инвестиция тартылған. Бұл республика көлеміндегі үшінші орын. Аймақта ауқымды жобалар да сәтті жүзеге асырылған. Ал алдағы уақытта қытайлық компания Шу ауданында жүгері өңдеу зауытын салмақ ниетті.

Ван Яньун, Shengtai Biotech компаниясының бас директоры:

- Біздің компания Жамбыл облысында жүгеріні терең өңдеу зауытын салып жатыр. Ол үшін 1,5 млрд доллар инвестция бағыттадық. Кәсіпорын толық келер жылдың қаңтарын айында іске қосылады. Алғашқы өнім ақпан айында шығады. Зауыттың жылдық қуаттылығы 500 мың тонна болады. Дайын өнімдерді Еуропа, Солтүстік Америка, Азия елдеріне экспорттауды жоспарлап отырмыз.

Индустриялық аймақта Президент әйнек өндіретін кәсіпорын қызметімен де танысты. Кәсіпорын биыл жазда іске қосылған. Жылына 500 мың шаршы метр әйнек өндіреді. Қазір зауытта 50 адам еңбек етіп жатыр.

Риат Шони, Ержан Қанапияұлы және Бахытбек Нұртаев