Гуманоид робот дәуірі келе жатыр

Танымал Forbes журналы 50 миллиардердің есімін жариялады. Бұл технологияның тілін білетін әлемдегі ең бай кәсіпкерлердің тізімі.

Ал олардың негізгі табысы жасанды интеллекттен түскен. Биыл инвесторлар тарапынан бұл салаға 200 млрд доллардан астам қаражат құйылған. Statista сараптамалық порталы жасанды интеллектінің биылғы нарықтағы үлесін 254,5 млрд доллар деп бағалады. Бұл қарқын жыл сайын 37% пайызға артып, алдағы 6 жыл ішінде 1 трлн ($1,68 трлн) долларан асуы мүмкін.

Иә, таңқалудан гөрі, технологияда қандай жаңалық бар, содан уақытында хабардар болып, көштің соңында қалмай, үнемі ілесіп отыру бүгінгі заманның талабы.

Адам жыл сайын жасына жас қосса, жасанды интеллект ақылына ақыл қосып үлкен қарқынмен дамып келеді. Енді жасанды интеллект келер жылы бізді несімен таңқалдыруы мүмкін?

Гуманоид-робот дәуірі келе жатыр

«Келер жылы жасанды интеллект тек құрал емес, адамның сенімді серігіне айналады». Microsoft сарапшылары осылай дейді. Әсіресе роботехника саласындағы салмағы басым болмақ. Соның ішінде гуманоидтық, яғни адамға ұқсас роботтардың дәуірі келе жатыр. Бұл дегеніміз, осыған дейін робот тек қозғалуды білсе, енді ойлай алады.  Шешімді де өзі қабылдауы ғажап емес. Яғни фантастика емес, нақты коммерциялық даму траекториясына айналды. Bank of America сарапшыларының бағалауына қарағанда, әлем бойынша 2030 жылға қарай жыл сайын 1 млн-ға жуық гуманоид робот сатылуы мүмкін, ал 2060 жылға қарай 3 млрдқа дейін жетеді деген болжам бар. Бұл олардың тек өндірісте ғана емес, тұрмыста, қызмет көрсету саласында да кеңінен қолданыла бастайтынын көрсетеді.

Модар Алауи, Humanoids summit негізін қалаушы:

- Жасанды интеллект пен роботтардың үйлесімі робототехникаға жаңа бағыт әкелді. Тың серпіліс әкелді. Бұрын елестеткен дүниелерді, қазір іс жүзінде орындауға мүмкіндектер ашылды.

Гуманоид-робот дәуірі келе жатыр

Биыл бұл роботтар биледі, жүгірді. Былғары қолғап киіп шаршы алаңда сынға түсті. Бейәдеп әрекеттері де аз болған жоқ. Кей қылықтары шектен шығып, жанындағасын байқамай, адамды соғып өткен тұстары көп.

Дегенмен құлтемірге қызығатындар көп. McKinsey консалтингтік компаниясының дерегі бойынша, биыл әлемдік компаниялар адамға ұқсас роботтарды жасауға кемінде 100 миллион доллардан астам қаржы бөлген. Әсіресе Қытайда сұраныс жоғары. Бұл елде адам да, робот та көп. Биыл 542 мың өнеркәсіптік робот іске қосылса, соның 295 000-ы Қытайда.

Ван Чуан, Қытайлық Agibot компаниясының жалпы бизнес жөніндегі президенті:

- Робототехника саласында әр екі ай сайын жаңа бір дүние пайда болады. Бүгін нобайы жасалған жоба, ертең іске қосылуы мүмкін.  Биыл мұны тәжірибе барысында көрдік. Келер жылы бұл үдеріс одан да қарқын ала түседі.

Қытайда роботтарды жалға беру қызметі бар

Қытайда роботтар көп болғанымен, қымбат. Осыған байланысты тақауда Қытайда роботтарды жалға беретін инновациялық платформа іске қосылды. Қосымша арқылы үй шаруасына көмектесетін және бала күтуші құлтемірлерді  уақытша пайдалануға болады. Жаңа сервис құрылғыларды сатып алмай-ақ пайдалануға мүмкіндік береді. Сарапшылардың айтуына қарағанда, жаңа қызметке сұраныс жоғары болмақ. Келер жылы бұл нарықтың көлемі он миллиард юаньнан асуы мүмкін.

Ли Иян, компанияның бас директоры:

- Меніңше, роботтарды жалға алу нарығының мүмкіндігі өте зор. Себебі мұндай құрылғылар әлі де қымбат, оны көп адам бірден сатып ала алмайды. Сондықтан біз адамдарға роботты сатып алмай-ақ, уақытша пайдалану арқылы оның мүмкіндігін көруге жағдай жасап отырмыз. Бұл технологиямен жақынырақ танысуға мүмкіндік береді.

Жапония ұлттық ЖИ моделін жасауға ниетті

Биыл жасанды интеллектіні мемлекеттік деңгейде де заңдастыру мәселесі бірқатар елде көтерілді. Мәселен, Жапония жасанды интеллект моделін жасап шығару үшін 19 млрд доллар бөлмек. Оған 10-нан астам жапондық компания қатысады. Мемлекет жалпы шығынның шамамен үштен бір бөлігін қаржыландырады, қалғанын жеке корпорациялар көтереді. Билік елді жасанды интеллектінің даму ошағына айналдыруды көздеп отыр. Ұлттық модельді әзірлеу жұмыстары келер жылы басталады деп жоспарланған.