Хаби Алонсо тактикасына болжам: Дастан Сәтпаев Челсиде қай позицияда ойнауы мүмкін?

Qazsport телеарнасының комментаторы Ернұр Дүйсенғазының айтуынша, Сәтпаев үшін шешуші кезең маусым алдындағы оқу-жаттығу жиыны болмақ. Барлық ойыншылардың басын қосатын жиында бапкер әр футболшының деңгейін бағалайды.

«Егер Дастан өзінің дарыны мен мүмкіндігін көрсете алса, негізгі құрамнан орын алуы да ғажап емес. Өйткені соңғы маусымда «Челсидің» шабуыл шебіндегі ойыншылардың барлығы бірдей тұрақты ойын көрсете алған жоқ», дейді ол.

Сарапшының пікірінше, Дастанның басты артықшылықтарының бірі − оның бірнеше шабуыл позициясында ойнай алуы. Сондықтан бапкер оны тек орталық шабуылшы ретінде ғана емес, қапталдағы шабуылшы немесе еркін шабуылшы рөлінде де пайдалана алады. Дегенмен, «Челси» секілді алпауыт клубта бәсекелестік өте жоғары. Ернұр Дүйсенғазының айтуынша, негізгі құрамға бірден өте алмаған жағдайда Сәтпаев клубтың серіктес командасы саналатын Францияның «Страсбур» клубына жіберілуі мүмкін. Бұл оның ойын тәжірибесін арттырып, кейін негізгі құрамға оралуына мүмкіндік береді.

Дастан Сәтпаевтың жейдесі Будапешттегі арнайы көрмеге қойылды

Футбол жанкүйерлерінің пікірінше де Хаби Алонсоның ойын философиясы Сәтпаевқа қолайлы болуы ықтимал. Испаниялық маман жас ойыншылармен жұмыс істеуде жақсы нәтижелер көрсетіп келеді және шабуылдағы жылдам, техникалық футболшыларға сенім артады. Дастанның жылдамдығы, техникасы және шабуылдағы белсенділігі оның бірнеше позицияда ойнауына мүмкіндік береді.

Ал спорт журналисі Халым Күзеухан жас футболшының бірден негізгі құрамнан орын алуы екіталай екенін айтады. Оның пікірінше, «Челси» әлемнің түкпір-түкпірінен талантты ойыншыларды жинайтын клуб болғандықтан, әр орын үшін күрес өте жоғары деңгейде жүреді.

«Мұндай клубтарда жастарға мүмкіндік беріледі. Бірақ олардың әрқайсысы алдымен өз деңгейін дәлелдеуі керек. Сондықтан Сәтпаев үшін ең маңыздысы − тұрақты даму мен ойын тәжірибесін жинақтау», дейді ол.

Ал «Aladop.kz» спорттық порталының тілшісі Өнер Айболаттың пікірінше, Дастан Сәтпаев соңғы бірнеше жылда өзін дәлелдеп келе жатқан талантты футболшылардың бірі. Алайда ол да Еуропаның алпауыт клубында негізгі құрамға бірден ену оңай емес екенін атап өтті. Шындыққа тура қарасақ, 18 жастағы қазақ футболшысының бірден ағылшын Премьер-лигасында ойнап кетуі өте қиын. «Челсидегі» бәсекелестік деңгейі жоғары. Сондықтан алғашқы кезеңде оны жастар құрамасында немесе серіктес клубтардың бірінде сынап көруі мүмкін. Бұл қалыпты тәжірибе. Ең бастысы − ойын тәжірибесін жоғалтпай, даму жолын жалғастыру. Сонда ғана болашақта негізгі құрамға жол ашылады.

Дастан Сәтпаевтың командасы: Хаби Алонсо «Челсидің» бас бапкері атанды

«Шын мәнінде, бүгінгі футболда жас ойыншының бірден Премьер-лига деңгейінде жарқырап кетуі сирек кездеседі. Сондықтан Сәтпаев үшін ең тиімді жол − клуб жүйесінде қалып, тәжірибе жинау. Егер ол өз мүмкіндігін дұрыс пайдаланып, физикалық әрі тактикалық тұрғыдан өссе, болашақта негізгі құрамға жол ашылуы әбден мүмкін», дейді Өнер Айболат.

Қорытындылай айтқанда, Дастан Сәтпаевтың «Челси» жүйесіне қосылуы оның мансабындағы ғана емес, қазақ футболы үшін де маңызды белес. Алайда үлкен клубтың табалдырығын аттау мен сол клубта тұрақты ойнаудың арасы жер мен көктей. Сондықтан бүгіннен бастап оны Премьер-лиганың жұлдызына айналдырып жіберу де, керісінше мүмкіндігін жоққа шығару да асығыстық болар еді. Қазір Дастанға ең қажет нәрсе − тұрақты даму, еңбек және шыдам. Егер ол жоғары деңгейдегі бәсекеге төтеп беріп, өз мүмкіндігін дәлелдей алса, «Челсидің» негізгі құрамына жол табуы әбден мүмкін. Ал бұл тек бір футболшының жетістігі емес, отандық футболдың жаңа белеске көтерілгенін көрсететін маңызды оқиға болмақ.

«Челси» жанкүйерлері Дастан Сәтпаевтың голына тәнті болды

Жанасыл ЗАЙТИМХАН, 

ЕҰУ студенті