ХАМАС Израильге кепілге алынған төрт адамның денесін тапсырды

ХАМАС өкілдері кейбір мәйіттерді алу қиынға соғатынын, өйткені кепілге алынғандар Газа секторының әртүрлі аймақтарында түрлі топтардың қолында болып қайтыс болғанын мәлімдеді. 

Бұдан басқа, содырлар кейбір адамдардың денелері соғыс кезінде қираған ғимараттар үйінділері астында қалуы мүмкін екенін, оларды алып шығу үшін ауыр техника қажет деп мәлімдеді.

Израиль қорғаныс күштері (ЦАХАЛ) қаза болған кепілге алынғандардың денелері салынған төрт табыттың әскери қызметкерлердің бірге еріп жүруімен Израиль шекарасынан өткенін және сәйкестендіру жүргізілетін Сот медицина институтына жеткізілгенін хабарлады. Марқұмдардың отбасыларымен бірге ЦАХАЛ өкілдері еріп жүр. 

Times of Israel жазуынша, ХАМАС сәрсенбі күні кепілге алынған тағы төрт адамның денесін қайтаратынын мәлімдеді. 

Мәйіттер Израиль Палестина тобынан өлген адамдардың сүйектерін тапсыру жөніндегі міндеттемелерін орындауды талап етіп, Рафах шекара бекетін жабық күйде ұстайтынын және Газаға гуманитарлық көмек жеткізілімін азайтатынын жариялағаннан кейін қайтарылды. Бұған дейін Израиль премьер-министрі Биньямин Нетаньяху қалған кепілге алынғандар туралы хабарды «бірнеше сағаттың ішінде» күтетінін мәлімдеген. 

- Жақында бірнеше сағат ішінде тағы бірнеше қаза болған кепілге алынғандардың қайтарылуы туралы хабар аламыз. Бірақ біз олардың барлығын қайтармақпыз, - деді Нетаньяху дүйсенбі күні босатылған тұтқындар жатқан ауруханаға барған кезде.

Бұған дейін АҚШ президенті Дональд Трамп та ХАМАС-тан барлық өлген израильдік кепілге алынғандардың мәйіттерін қайтаруды талап етіп, оның Газадағы бейбітшілік жоспарының келесі кезеңі басталғанын мәлімдеген. 

- Барлық 20 тқтқын оралды және күтілгендей өздерін жақсы сезініп жүр. Мойынымыздан үлкен жүк түсті, бірақ жұмыс әлі аяқталған жоқ. Қаза болғандар уәде етілгендей қайтарылмады. Екінші кезең дәл қазір басталады! – деп жазды Трамп Мысырда бейбіт жолмен реттеу туралы декларацияға қол қойылған күннің ертеңіне өзінің Truth Social әлеуметтік желідегі парақшасында.

Кеше Мысырдың Шарм-эль-Шейх қаласында қол қойылған атысты тоқтату келісімінің егжей-тегжейі белгісіз болып қалып отыр. Трамптың бейбітшілік жоспарының бірінші фазасы негізінен израильдік кепілге алынғандар мен палестиналық тұтқындарды айырбастауға, сондай-ақ Газадан әскерді ішінара шығаруға бағытталған.

ВВС жазуынша, келісімнің келесі кезеңдері бойынша келіссөз барысында бірқатар даулы мәселелер туындауы мүмкін, соның ішінде ХАМАС-ты қаруын тастауға шақыру – топ бұл мүмкіндікті қабылдамай отыр. 

Сейсенбі күні Трамп Ақ үйде егер содырлар бұны өз еркімен жасаудан бас тартса, ХАМАС-ты қарусыздандыруға уәде беріп, қажет болған жағдайда бұл мақсатқа күшпен жетуге болатынын қосып өтті. 

- Егер олар қаруын тастамаса, біз оларды қарусыздандырамыз. Және бұл тез және мүмкін күш қолдану арқылы болады, - деп мәлімдеді америкалық көшбасшы Ақ үйде Аргентина президенті Хавьер Милеймен кездесуі кезінде.

Бұған дейін АҚШ президенті Дональд Трамп пен Мысыр, Қатар мен Түркия басшылары Газада атысты тоқтату туралы келісімдерді бекітетін құжатқа қол қойды. Қол қою рәсімі Қызыл теңіз жағалауында Мысырдың курортты Шарм-эш-Шейх қаласында 13 қазан күні басталған «Бейбітшілік - 2025» халықаралық саммитінің аясында өтті.