ІІМ артық салмағы бар полицейлерге қатысты: Арнайы бағдарлама қарастырылмаған

Полицей формасы тек бедел емес — жауапкершілік пен тәртіп нышаны. Сондықтан ішкі істер органдарында қызмет ететін әр қызметкердің физикалық дайындығы мен денсаулығы тұрақты бақылауда. Олар жыл сайын кәсіби қызметтік және физикалық дайындық деңгейі бойынша тексеруден өтеді. Әрбір қызметкердің физикалық дайындығы байқалады. Қару қолдану шеберлігі және жауынгерлік күрес әдістері сияқты бақылау нормативі бар. Компьютерлік тестілеу арқылы қолданыстағы заңнаманы білу деңгейі де анықталады. Ішкі істер министрлігінің мәліметінше, мұндай тексеріс барлық бөліністе тұрақты негізде жүргізіледі.

— Полиция қызметкерлерінің физикалық дайындығын бағалау ішкі істер органдарының қызметіне қойылатын талаптарға сәйкес қызметтік міндеттерін тиісті деңгейде орындауға мүмкіндік береді әрі кәсіби даярлықтың жоғары деңгейін қамтамасыз етеді.
Полиция қызметкерлерінде артық салмақ әртүрлі фактордың, соның ішінде генетикалық бейімділік, дененің жеке қасиеттері және метаболикалық процестердің әсерінен қалыптасуы мүмкін. Ішкі істер министрлігінде жеке салмақтан арылту бағдарламалары қарастырылмаған. Дегенмен, денені шынықтыру және артық салмақтың алдын алуға бағытталған іс-шаралар жүйелі түрде жүзеге асырылады, — деген жауап алдық ведомстводан.

Сонымен, ішкі істер органдарының қызметкерлері артық салмақтың қалай алдын алып жатыр.

Мынадай тәсілдер атқарылады: 

— тұрақты сабақтар;
— дене шынықтыру дайындығы бойынша нормативтерді тапсыру;
— жоспарлы медициналық тексеруден өту;
— спорттық-бұқаралық іс-шараларға қатысу;
— ведомствоішілік спорттық челлендждер мен акцияларға қатысу;
бөліністердің спорт залдарында жаттығу;
— салауатты өмір салты ұстану бойынша профилактикалық шаралар.

Осы орайда, Ішкі істер министрлігі полицейдің қызметін тоқтату негіздері «Құқық қорғау қызметі туралы» Қазақстан Республикасының 2011 жылғы 6 қаңтардағы заңына сәйкес белгіленетінін мәлімдейді. 

— Артық салмақ — қызметкерді жұмыстан шығаруға негіз емес, шешім тек әскери-дәрігерлік комиссияның қорытындысы негізінде қабылданады. Сонымен қатар полиция қызметкерлерінің қызметтік міндеттерін орындауына ешқандай сыртқы факторлар ықпал ете алмайды, себебі қызметтік міндеттерге физикалық тұрғыда дайын болу — ішкі істер органдарындағы қызметтің ажырамас талабы, — деп жазылған ведомство жауабында.

Айта кетсек, мамандар артық салмақ пен семіздіктің таралуы тұрғылықты жерге де байланысты екенін айтады. Қалалық жерлерде бұл көрсеткіш ауылға қарағанда едәуір жоғары болады.