Иісі өкпеге тұрып қалды қазақстандық әйел Алматыға баратын әйелдер вагонындағы жағдайға шағымданды

Ақтөбе - Алматы бағытындағы №24 пойыздың жолаушысы жол жүру кезіндегі қолайсыз жағдайлар туралы айтып берді. Оның сөзінше, әйелдер вагонында екі тәулік бойы солярканың иісі мүңкіп тұрған, ал қосулы тұрған кондиционердің кесірінен жолаушылар тоңып қалған, - деп хабарлайды Tengri Travel.

"Жүрегіміз айнып, иіс сіңіп қалды"

Қазақстандық әйел өз оқиғасын әлеуметтік желіде бөлісті. Ол 26 тамызда Ақтөбеден басқа жолаушылармен бірге пойызға отырған. Оның айтуынша, Алматыға дейінгі шамамен екі күндік жол өте жайсыз өткен.

Жолаушының айтуынша, мәселе Ақтөбеден пойызға отырған бойда басталған. Вагонда қолқаны қабатын солярка иісі сезілген, ал жолсеріктің әрекеті жағдайды одан сайын ушықтырған.

"Бұл өте ауыр екі күн болды: бүкіл вагонда солярка иісі мүңкіп тұрды. Бұл иісті азайту үшін жолсерік кондиционерді қосып қойды, соның кесірінен тоңып қалдық. Бізді не жылы киім, не көрпе құтқара алмады", - деп бөлісті жазба авторы.

Қазақстандық әйел әйелдер вагонының жағдайына шағымданды. Скриншот: Threads

Кішкене болса да жылынып, жағымсыз иістен аулақ болу үшін жолаушылар көрші вагондарда отыруға мәжбүр болған. Олардың байқауынша, онда бәрі дұрыс болған. Жолаушы әйел жолсеріктің жұмыс чаты арқылы әріптестерімен байланысуға тырысқанын, бірақ жауап ала алмағанын айтты. Балама ретінде пойыз қызметкері әйелдерге вагондар арасындағы өтпе жолда түнеуді ұсынған, өйткені ол жер жылырақ әрі жанармай иісі жоқ болып шыққан.

"Тіпті сіріңке де жақтық", - дейді жолаушы.

Жарияланым авторы мұндай жағдайлар жай ғана қолайсыздық тудырып қоймай, денсаулыққа да қауіп төндіретінін баса айтты.

"Ойлап қарасаңыз, бұл иістен улануға болады. Ол өкпеге сіңіп қалды, жүрегіміз айныды. Тұтас пойызда бір ғана әйелдер вагоны бар. Тек әйелдер, бойжеткендер мен қыздар бара жатқан вагонда қалыпты жағдай жасауға болмас па еді?", - делінген жазбада.

Жазба желі қолданушылары арасында үлкен резонанс тудырды.

"Ол жерде солярка қайдан жүргені қызық", "Айтпақшы, әйелдер вагонында әрқашан бір иіс, не көмірдің иісі шығып тұрады. Ол әдетте ең соңында болады, сондықтан басқа вагондарда мұндай иіс жоқ", "Сұмдық-ай", - деп жазды пікір қалдырушылар.

Тасымалдаушы не дейді?

Жағдайға байланысты пікір алу үшін біз "Жолаушылар тасымалы" АҚ-на жүгіндік. Компания жолаушының Ақтөбе - Алматы бағытындағы №24 пойыздағы жағдайға байланысты пойыз бригадасына шағымданғанын растады.

Пойыз бастығының мәліметінше, бригада жолаушының өтінішіне жедел жауап беріп, тиісті шаралар қабылдаған.

"Пойыз бастығының ақпараты бойынша, пойыз бригадасы өтінішке жедел әрекет етіп, жайлы жол жүруді қамтамасыз ету үшін қажетті шараларды қолданды және келтірілген қолайсыздықтар үшін жолаушыдан кешірім сұрады. Айта кетейік, вагон белгіленген талаптарға сәйкес жоспарлы техникалық қызмет көрсетуден және жөндеуден өткен болатын", - деп хабарлады тасымалдаушы.

Сонымен қатар, тасымалдаушы берген түсініктемеде иістің шығуына нақты не себеп болғаны, сондай-ақ жол жүру кезінде пойыз бригадасы тарапынан қандай шаралар қабылданғаны нақтыланбаған.

Пойызда сапасыз қызметке тап болсаңыз, не істеу керек?

Егер вагондағы жағдай нормаларға сәйкес келмесе (суық, жат иістер, жабдықтардың бұзылуы), жолаушылар оларды сол жерде түзетуді талап ете алады немесе бақылаушы органдарға шағым жолдай алады.

Бірыңғай анықтама қызметі: 1433 нөмірі бойынша (қоңырау шалу тегін). Көлік министрлігінің Ситуациялық орталығы: мессенджерлер арқылы +7 700 098 35 35 нөмірі бойынша.

Google News арқылы жаңалықтарымызды қадағалаңыз

Жазылу