ИКАО: Қазақстан авиациясы 95,7% қауіпсіз

Қазақстан авиациялық қауіпсіздік бойынша ТМД мен ИКАО-ның Еуро-Азиаттық аймағында көшбасшылар қатарына кірді.  

Халықаралық азаматтық авиация ұйымы жүргізген кешенді тексеру нәтижесінде стандарттарға сәйкестік деңгейі 95,7 пайызды құрады. Бұл ТМД бойынша ең үздік нәтиже саналады.

Тексеріс кезінде авиациялық қауіпсіздік саласындағы заңнама, сапаны бақылау бойынша міндеттемелер, мамандардың біліктілігі, техникалық мәселелер сынды маңызды факторлар ескерілді. Бұған дейін Қазақстанның ИКАО-дағы рейтингі 83 пайыз болған. Өсім көрсеткіші шамамен 13 пайыз.

Ал ТМД елдеріндегі қазіргі авиациялық қауіпсіздікке зер салсақ. Ресей - 94,14%, Беларусь - 91,85%, Грузия - 89,75%, Қырғызстан - 85,76%, Өзбекстан - 85,47%, Әзербайжан - 74,66%.

Дархан Қатышев, ҚР КМ Азаматтық авиация комитеті төрағасының орынбасары:

- АҚШ-қа рейстерді ашуды жоспарлап отырмыз. Оны ашу үшін біз неше түрлі аудиттерден өтеміз. Осы аудиттің көрсеткіштеріне де қарайды.

Көрсеткіштердің сәйкестігі қазақстандық әуежайлардың жоғары қауіпсіздігін растайды. Бұл әуе компаниялары тарапынан сенімнің өсуіне, сондай-ақ мұхиттың арғы жағына тікелей рейстерді ашу үшін ұшулардың бірінші санатын алуға ықпал етеді.

Серік Мықтыбаев, авиасарапшы:

 - Әлбетте, ИКАО тарапынан берілген баға Қазақстан беделіне жоғары ұпай қосары сөзсіз. Осы арқылы салалық нарыққа жаңа әуе компаниялары келуі мүмкін. Ізінше жаңа инвестициялар да келеді деген сөз. Туризм дамиды, елдер арасында сауда-экономикалық байланыс артады.

ИКАО-ның жоғары бағасы - еліміздің авиациялық саласында 2019 жылдан бастап іске асырылған кешенді реформалардың көрсеткіші. Тағы отандық авиациялық әкімшілікті дамытудың жемісі. Мамандардың біліктілігін арттырып, тәуекелге бағдарланған бақылау тетіктерін енгізудің нәтижесі саналады.

Авторы: Мирлан Алтынбек